Իրանի եւ Եվրասիական միության երկրների միջեւ ապրանքաշրջանառության ծավալը կմեծանա 10 անգամ
Իրանի արտաքին գործերի նախարարության բազմակողմ առևտրային և ֆինանսական համագործակցության վարչության պետ Ազիզ Մանսուրին հույս է հայտնել, որ Իրանի և Եվրասիական երկրների միջև ազատ առևտրի համաձայնագրի ստորագրմամբ Իրանի հետ ապրանքաշրջանառության ծավալը կմեծանա 10 անգամ։
Մանսուրին ասել է, որ եվրասիական համաձայնագիրը ներառում է միայն ապրանքաշրջանառություն, սակայն ապագայում մենք պետք է բանակցենք նաև ծառայությունների առևտրի ու տարանցման շուրջ։
Իրանի Արտաքին գործերի նախարարության այս բարձրաստիճան պաշտոնյան հայտարարել է եվրասիական տարածաշրջանի գործարարների համար վիզաները չեղարկելու Թեհրանի պատրաստակամության մասին՝ հավելելով, որ պետք է դյուրացվի վիզաների տրամադրումը, և մենք պատրաստ ենք ավելի շատ բանակցել Եվրասիական երկրների հետ։
Իրանի Առևտրի զարգացման կազմակերպության հայտարարության համաձայն՝ Իրանի և Եվրասիայի միջև ազատ առևտրի համաձայնագրի ստորագրմամբ ապրանքների 87%-ի մաքսատուրքը կզրոյանա, ինչը կհանգեցնի Իրանի և Եվրասիայի միության անդամների միջև ապրանքաշրջանառության ծավալների մեծացմանը։
Եվրասիական տնտեսական միությունը (ԵԱՏՄ) միջկառավարական տնտեսական միություն է, որը բաղկացած է Բելառուսից, Ղազախստանից, Ռուսաստանից, Ղրղզստանից և Հայաստանից։ Հայաստանը Իրանի միակ հարեւանն է, որն այս կարևոր միության անդամ է, և Իրանը Հայաստանը համարում է Եվրասիայի մուտքի դարպաս։