Իրանը պատրաստ է անխափան էլեկտրաէներգիա մատակարարել տարածաշրջանի երկրներին
Իրանի ծրագրային-բյուջետային կազմակերպության ղեկավարը ՄԱԿ-ի գլխավոր քարտուղարի տեղակալի հետ հանդիպմանն ասել է. «Չնայած դաժան պատժամիջոցներին, Իրանը պատրաստ է անխափան էլեկտրաէներգիա մատակարարել տարածաշրջանի երկրներին»։
ԻՌՆԱ-ի հաղորդմամբ՝ ՄԱԿ-ի Ասիայի և Խաղաղօվկիանոսյան տարածաշրջանի տնտեսական և սոցիալական հանձնաժողովի (ESCAP) 80-րդ տարեկան հանդիպմանը մասնակցելու նպատակով Բանգկոկ կատարած այցի շրջանակում, Դավուդ Մանզուրը հանդիպել է ՄԱԿ-ի գլխավոր քարտուղարի տեղակալ և ESCAP -ի գործադիր տնօրեն Ալիս Ջաբանայի հետ։
Հանդիպմանն ընդգծելով երկրների զարգացման հարցում այնպիսի կառույցների դերն ինչպիսին է ESCAP-ը, Դավուդ Մանզուրը նշել է․ «Կարևոր է օգտագործել ՄԱԿ-ի տարբեր կառույցների կարողությունները՝ տարածաշրջանային համագործակցությունը զարգացնելու, միջանցքների նախագծերն ավարտին հասցնելու և երաշտի դեմ պայքարելու համար»։
Կարևորելով ESCAP-ի այս տարվա հանդիպման թեման, Մանզուրն ընդգծել է համաշխարհային տնտեսության ապագայում թվային տնտեսության դերի մեծացման անհրաժեշտությունը, հավելելով. «Իրանը շահագրգռված է կայուն զարգացման ճանապարհին օգտագործել ՄԱԿ-ի բոլոր կարողությունները և պատրաստ է համագործակցել թվայնացման ոլորտում»։
Անդրադառնալով աշխարհի կարևորագույն մարտահրավերներից համարվող ջրային ռեսուրսների սակավությանը, նա հավելել է․ «Իրանի Իսլամական Հանրապետությունը պատրաստ է համագործակցել ՄԱԿ-ի հետ՝ ջրային ռեսուրսների կառավարման ոլորտում»։
«Աղետների դեմ պայքարը՝ կայուն զարգացման հասնելու նպատակով» թեմայով հանդիպմանն ընդգծելով, որ Իրանը կարևոր քայլեր է արել՝ աղետների ռիսկի և դրա հետ կապված խնդիրների արդյունավետ նվազեցման խնդիրն ազգային, տեղական և ոլորտային պլանավորման և բյուջետավորման կառավարման հարցերում ներառելու ուղղությամբ, Մանզուրը հավելել է․ «2023 թվականին տարերային աղետների թիվն ու ուժգնությունն աճել է, ինչը վկայում է նոր պայմաններին հարմարվելու գործիքակազմի կիրառման անհրաժեշտության մասին»։
