Միայն Իրանն է աջակցում Հայաստանին՝ դեմ հանդես գալով «Զանգեզուրի միջանցքին»․ ԻԻՀ դեսպան
Միայն Հայաստանն ու Իրանն են, որ այսպես կոչված «Զանգեզուրի միջանցքի» մասով միատեսակ են մտածում։
Իսլամական հեղափոխության հաղթանակի 46-րդ տարեդարձի կապակցությամբ հրավիրված ասուլիսի ժամանակ այս հայտարարությունն արեց Հայաստանում Իրանի դեսպան Մեհդի Սոբհանին։
«Միայն Իրանն է աջակցում Հայաստանին՝ դեմ հանդես գալով այսպես կոչված «Զանգեզուրի միջանցքին»։ Տարածաշրջանի երկրների շարքում միայն Իրանն է այս հարցում Հայաստանի կողքին կանգնած»,- շեշտեց դեսպանը։
Նա հավելեց, որ այս հարցում Հայաստանի հետ տարաձայնություններ չկան, «Զանգեզուրի միջանցքը» վնաս է և՛ Հայաստանին, և՛ Իրանին։
Հիշեցնենք` ավելի վաղ Ադրբեջանի նախագահ Իլհամ Ալիևը հայտարարել էր, որ Բաքուն Հայաստանի նկատմամբ տարածքային պահանջներ չունի, սակայն Հայաստանը պետք է կատարի իր պարտավորությունները՝ Նախիջևանից Ադրբեջան անարգել երթևեկություն տրամադրելով:
Փաշինյանն էլ հայտարարել է, որ Հայաստանը դեմ չէ Նախիջևանի և Ադրբեջանի արևմտյան հատվածի միջև անարգել երկաթուղային հաղորդակցությանը, բայց Հայաստանի իրավասության շրջանակներում:
