Պակիստանի վարչապետը պաշտոնական այցով կմեկնի Իրան
Պակիստանի վարչապետ Մուհամմադ Շահբազ Շարիֆը հեռախոսազրույց է ունեցել Իրանի նախագահ Մասուդ Փեզեշքիանի հետ, հաղորդում է Mehr-ը։
Նա հատուկ շնորհակալություն է հայտնել Իրանի նախագահին անցյալ ամիս կատարած հեռախոսազանգի, ինչպես նաև ճգնաժամի ժամանակ արտաքին գործերի նախարար Աբբաս Արաղչիին տարածաշրջան գործուղելու համար։
«Խստորեն դատապարտելով Պակիստանի վրա Հնդկաստանի չհրահրված հարձակումները, որոնք հանգեցրել են անմեղ քաղաքացիական անձանց, այդ թվում՝ կանանց ու երեխաների նահատակությանը, վարչապետը հայտարարել է, որ Պակիստանը միշտ ձգտել է խաղաղության, և հենց այս ոգով է նա համաձայնել Հնդկաստանի հետ հրադադարի մասին համաձայնագրին և կշարունակի հավատարիմ մնալ դրա պահպանմանը։
Նա վերահաստատել է Պակիստանի՝ իր ինքնիշխանությունն ու տարածքային ամբողջականությունն ամեն գնով պաշտպանելու հաստատակամությունը։ Սակայն վարչապետն իր մտահոգությունն է հայտնել Հնդկաստանի կողմից Ինդոսի ջրերի մասին պայմանագրի գործողությունը միակողմանիորեն կասեցնելու փորձի կապակցությամբ, ինչը, նրա կարծիքով, անօրինական է և Պակիստանի համար «կարմիր գիծ» է, քանի որ այդ ջրերը կենսական նշանակություն ունեն 240 միլիոն մարդու համար», - հաղորդում է Mehr-ը։
Պակիստանի վարչապետը հայտարարել է, որ Ջամմուի և Քաշմիրի շուրջ վեճը մնում է Հարավային Ասիայում անկայունության հիմնական պատճառը։
«Նա կոչ է արել դրա արդարացի կարգավորմանը՝ համաձայն ՄԱԿ-ի Անվտանգության խորհրդի բանաձևերի և քաշմիրցի ժողովրդի ձգտումների, ինչը տարածաշրջանում ամուր խաղաղության գրավականն է։ Իրանի նախագահն իր անկեղծ ցավակցությունն է հայտնել խաղաղ բնակիչների զոհվելու կապակցությամբ։ Նա ողջունել է հրադադարի մասին համաձայնագիրը և բարձր գնահատել Պակիստանի ջանքերը՝ խաղաղություն հաստատելու ուղղությամբ։ Նա ասել է, որ Իրանը հավատարիմ է տարածաշրջանում խաղաղությանն ու կայունությանը նպաստելու գործին։
Երկու երկրների ղեկավարները մտքեր են փոխանակել նաև Պակիստանի և Իրանի միջև երկկողմ հարաբերությունների շուրջ։ Նրանք պայմանավորվել են ամրապնդել համագործակցությունը փոխադարձ հետաքրքրություն ներկայացնող բոլոր, հատկապես առևտրի, հաղորդակցության, անվտանգության և մարդկանց միջև շփումների ոլորտներում։ Իրանի նախագահը վարչապետին հրավեր է ուղարկել պաշտոնական այցով Թեհրան այցելելու, որը սիրով ընդունվել է», - ասվում է հաղորդագրության մեջ։
