Արաղչի. Հորմուզի նեղուցի անապահովության պատճառը ԱՄՆ-ի և Իսրայելի ագրեսիան է
Իրանի ԱԳ նախարարը հայտարարել է, որ Հորմուզի նեղուցում անապահովությունն ու ծովային նավարկության խափանումը ԱՄՆ-ի և Իսրայելի գործողությունների հետևանքն են՝ նշելով, որ Իրանը ճնշման և սպառնալիքի ներքո չի հրաժարվի իր ինքնիշխան իրավունքներից։
Ինչպես հաղորդում է Pars Today-ը՝ հղում անելով IRIB-ին՝ սեյեդ Աբբաս Արաղչին, Նյու Յորքում լրագրողների հետ հանդիպման ժամանակ, ընդգծել է, որ հնարավոր չէ ռմբակոծել որևէ երկիր և սպառնալ դրա ոչնչացմամբ և միաժամանակ ակնկալել, որ անվտանգությունն ու նավարկությունն առանց ընդհատումների կվերականգնվեն։
Արաղչին ասել է, որ Իրանը շարունակում է հավատարիմ մնալ միջազգային իրավունքին, ՄԱԿ-ի կանոնադրությանը և դիվանագիտությանը՝ որպես այդ մոտեցման օրինակ նշելով բանակցությունները, որոնք հանգեցրին ՀԳՀԾ-ին, ինչպես նաև վերջին երկու տարիների դիվանագիտական ջանքերը։
Իրանի արտաքին գործերի նախարարն ԱՄՆ-ին մեղադրել է սպառնալիքի, տնտեսական պատերազմի և քաղաքական հարկադրանքի համար ճնշում կիրառելու մեջ՝ նշելով, որ Իրանի դեմ ԱՄՆ-ի և Իսրայելի հարձակումների ընթացքում զոհվել է ավելի քան 5 հազար մարդ։
Արաղչին ընդգծել է, որ Իրանը հավատարիմ է անվտանգ նավարկությանը, սակայն ծովային անվտանգությունը չի ապահովվում սպառնալիքի, շրջափակման կամ տնտեսական ճնշման միջոցով։
Նա նաև հայտնել է, որ Քաթարի միջոցով ԱՄՆ-ին է փոխանցվել յոթօրյա ծրագիր՝ նշելով, որ ներկայացված պայմանների ապահովման դեպքում Հորմուզի նեղուցը կարող է վերաբացվել, իսկ ծովային բնականոն երթևեկությունը՝ յոթ օրվա ընթացքում վերականգնվել։