Արաղչի․ Իրանը ԱՄՆ-ի միակողմանիության զոհն է

Pars Today- Իրանի Իսլամական Հանրապետության արտաքին գործերի նախարարն ասել է. «Իրանը ԱՄՆ-ի միակողմանիության և սիոնիստական ​​ռեժիմի արկածախնդրության զոհն է, սակայն այս խնդիրները չեն ստիպել Թեհրանին՝ որպես ակտիվ միջազգային դերակատար անտեսել իր պարտականությունները»։

Իրանի Իսլամական Հանրապետության արտաքին գործերի նախարար Սեյեդ Աբբաս Արաղչին երեքշաբթի օրը Թեհրանում «Իրանը և Տնտեսական համագործակցության կազմակերպությունը (ECO)» թեմայով երկրորդ ազգային համաժողովի բացման ելույթում ասել է.«Այսօր աշխարհը, առավել քան երբևէ, կանգնած է սանձարձակ միակողմանիության առջև։ Այս մտահոգիչ միտումը միջազգային կարգը դարձրել է ավելի փխրուն, լուրջ մարտահրավերների է ենթարկել տարածաշրջանային և համաշխարհային խաղաղության ու անվտանգության պահպանումը, ինչպես նաև սահմանափակել ու խեղաթյուրել է երկրների միջև համագործակցության հնարավորությունները»։ 

Ըստ Pars Today-ի, Արաղչին ընդգծելով բազմակողմ մեխանիզմների ամրապնդման անհրաժեշտությունը հավելել է. «Զարգացող երկրների միջև բազմակողմ ձևաչափերով համագործակցությունն ու սիներգիան այլևս ընտրություն չէ, այլ անհրաժեշտություն: Իրանի Իսլամական Հանրապետությունը դարձել է Ամերիկայի ճնշող միակողմանիության և սիոնիստական ​​ռեժիմի վտանգավոր արկածախնդրության զոհը և  տակավին  բախվում է դրա հետևանքներին, բայց որպես ակտիվ ու ազդեցիկ դերակատար՝  բազմակողմ և տարածաշրջանային տնտեսական և զարգացման հարաբերություններում չի անտեսում իր պարտականությունները, որի մասին է վկայում  այս համաժողովը»:

Արաղչին հավելել է. «RCD կազմակերպության և այնուհետև դրա  ժառանգորդ՝  ECO-ի կազմակերպության հիմնադրումից անցել է ավելի քան վեց տասնամյակ: Այս տարածաշրջանային համագործակցության կառուցվածքը, անկասկած, զարգացող աշխարհի ամենահին տնտեսական համագործակցության մեխանիզմն է: Այս տարիների ընթացքում արժեքավոր հիմքեր են դրվել և համագործակցության շրջանակներ են ստեղծվել տարբեր տնտեսական ոլորտներում: Այնուամենայնիվ, այն, ինչ մենք այսօր տեսնում ենք, ոչ մի կերպ չի համապատասխանում ECO-ի տարածաշրջանի հսկայական կարողություններին և ներուժին: ECO կազմակերպությունը կարող է դառնալ հարևան երկրների միջև բազմակողմ տնտեսական համագործակցության հաջողակ մոդել»:

Իրանի արտաքին գործերի նախարարը նաև ընդգծել է  ապագա ճգնաժամերի նկատմամբ՝ Տնտեսական համագործակցության կազմակերպության (ECO) անդամ պետությունների անհատական ​​և կոլեկտիվ դիմադրողականության ամրապնդման անհրաժեշտությունը, ասելով. «Էներգետիկ անապահովությունը, պարենային անապահովությունը, աշխարհաքաղաքական ճգնաժամերը, համավարակները, կլիմայի փոփոխությունը, բնական աղետները, համաշխարհային տնտեսական տատանումները և համաշխարհային մատակարարման շղթաների խափանումները մեր տարածաշրջանի դեմ ուղղված սպառնալիքների շարքում են, և դրանց դիմակայելը պահանջում է պլանավորում և համակարգում: ECO-ի 10-ամյա տեսլականը պետք է լրջորեն անդրադառնա այս հարցերին»:

Արաղչին ընդգծել է. «Իրանի Իսլամական Հանրապետության համոզմամբ, ECO-ն կարող է և պետք է առաջատար և արդյունավետ դերակատարություն ունենա տարածաշրջանի տնտեսական նոր ճարտարապետության ձևավորման գործում; Ճարտարապետություն, որը հիմնված է գործընկերության, փոխադարձ հարգանքի և ընդհանուր շահերի սկզբունքների վրա»: