ԻՀՊԿ ՌԾՈՒ հրամանատար. անհամբերությամբ սպասում ենք ամերիկյան ռազմանավերը խորտակելու պահին
ԻՀՊԿ ՌԾՈՒ հրամանատարը նախազգուշացրել է ԱՄՆ-ին՝ հայտարարելով, որ իրանական ուժերը պատրաստ են Հորմուզի նեղուցի մերձակայքում դիմակայել ամերիկյան ռազմանավերին, և որ այդ ռազմավարական ջրային ուղին գտնվում է իրենց վերահսկողության ներքո։
Ինչպես հաղորդում է Pars Today-ը՝ վկայակոչելով IRNA-ն, կոնտրադմիրալ Ալի Ազմային երեքշաբթի երեկոյան Իրանի հեռուստատեսությանը տված հարցազրույցում ասել է. «Սպասում ենք, որ ամերիկյան ռազմանավերը մոտենան Հորմուզի նեղուցի մուտքին, որպեսզի խորտակենք դրանք»։
Անդրադառնալով Հորմուզի նեղուցից ամերիկյան ռազմանավերի հեռանալուն՝ նա ընդգծել է, որ Իրանը մարտավարական թույլ կողմերը վերածել է ուժեղ կողմերի, և որ ԱՄՆ-ն պետք է գործողությունների դաշտ մտնի՝ այս ջրային ուղու իրավիճակը գնահատելու համար։
ԻՀՊԿ ռազմածովային ուժերի հրամանատարը նաև նշել է, որ Հորմուզի նեղուցն ու Պարսից ծոցը գտնվում են այդ ուժերի վերահսկողության ներքո, իսկ Իրանի բանակի ռազմածովային ուժերը վերահսկում են Օմանի ծովը։
Ազմային, անդրադառնալով Հորմուզի նեղուցում նավերի երթևեկության խելացի վերահսկողությանը, հավելել է, որ նավերի անցումը Իրանի համար նախատեսված ուղիներով իրականացվում է տրված թույլտվությունների հիման վրա։ Նա նաև ընդգծել է, որ տարածաշրջանի երկրները կարող են առանց ԱՄՆ-ի ներկայության ապահովել իրենց տնտեսական, քաղաքական և ռազմական անվտանգությունը։