Քյամալվանդի. Իրանը միջուկային հարցով չի բանակցի ԱՄՆ-ի հետ
Իրանի ատոմային էներգիայի կազմակերպության խոսնակն ընդգծել է. «ԻԻՀ-ն միջուկային և իր ինքնիշխանության հետ կապված հարցերի շուրջ ԱՄՆ-ի հետ չի բանակցելու»:
Բեհրուզ Քյամալվանդին Չինաստանի պաշտոնական լրատվական գործակալություն՝ «Շին Հուա»-ի հետ զրույցի ժամանակ ասել է. «Վաշինգտոնի հետ բանակցության դռները բաց են, սակայն դա չի ներառում միջուկային կամ ինքնիշխանության հետ կապված հարցերը»:
«5+1 խմբի հետ Իրանի միջուկային համաձայնագիրը կամ ՀԳՀԾ-ն, 2015-ին որոշ պարտավորություններ է հստակեցրել կողմերի համար և բոլորը պիտի այս համաձայնագրի հանդեպ պատասխանատվություն զգան»,-ընդգծել է Իրանի ատոմային էներգիայի կազմակերպության խոսնակը:
Քյամալվանդին ՀԳՀԾ-ն շարունակաբար ոտնահարելու կապակցությամբ ԱՄՆ-ին զգուշացնելով, նշել է. «Եթե ԱՄՆ-ն կրկին փորձի Իրանի դեմ շրջափակումներ հաստատել, ԻԻՀ-ն անկասկած դրան կտրուկ պատասխան կտա»:
Իրանի և 5+1 խմբի միջուկային համաձայնությունը գործադրման է հանձնվել 2016 թվականի հունվարին, սակայն ԱՄՆ-ն լինելով այդ խմբի անդամներից մեկը շարունակ անհավատարիմ է գտնվել ՀԳՀԾ-ի գործադրման հարցում:
