Իրանի հյուսիս-արևմուտքում ևս երկու ահաբեկչական խմբավորումներ են ոչնչացվել
Իսլամական հեղափոխության պահապանների կորպուսի (ԻՀՊԿ) հրամանատարը հայտնել է երկրի հյուսիս-արևմուտքում գտնվող Սարվաբադ և Օշնավիե շրջաններում ևս երկու ահաբեկչական խմբավորումների հայտնաբերման ու ոչնչացման մասին: Փոխանցում է ԻՌՆԱ լրատվական գործակալությունը:
Բրիգադային գեներալ Մոհամմեդ Փաքփուրը նշել է.«Եվս երկու ահաբեկչական խմբավորումներ զուր ջանքեր էին գործադրում Իրանի իսլամական հանրապետության տարածք ներթափանցելու համար, սակայն հետախուզական ու անվտանգության աշխատակիցների շնորհիվ, դրանք ոչնչացվեցին: Ահաբեկիչներից վեցը սպանվեցին, իսկ երեքը վիրավորվեցին»:
Նշելով, որ ահաբեկիչներիի մոտ եղել է մեծ քանակությամբ զենք, զինամթերք ու սարքավորումներ, Իսլամական հեղափոխության պահապանների կորպուսի հրամանատարն ընդգծել է.«Իսլամական հեղափոխության պահապանների կորպուսի ցամաքուժը կպատասխանի Իրանի անվտանգության դեմ ուղղված ցանկացած քայլի»: