Ռոհանի. «Թեհրանը կշարունակի մնալ Դոհայի կողքին»
Կատարի Էմիրի հետ ունեցած հեռախոսազրույցում ԻԻՀ նախագահը ողջունել է երկկողմ հարաբերությունների ընդլայնումը: «Ոչ մի արգելք չկա Կատարի հետ հարաբերությունների ընդլայնման ճանապարհին և Թեհրանը կշարունակի մնալ Դոհայի կողքին». ընդգծել է նա:
Այսօր Կատարի Էմիր Շեյխ Թամիմ Բին Համադ Ալե Սանիի հետ ունեցած հեռախոսազրույցում Հասան Ռոհանին ասել է. «Անարդար շրջափակման, սպառնալիքների ու ճնշումների նկատմամբ Կատարի ժողովրդի ու կառավարության դիմադրությունը գնահատելի է»:
Նախագահի խոսքով՝ Իրանի Իսլամական Հանրապետությունը Կատարի շրջափակումը համարում է անարդար քայլ, ինչը պառակտում է առաջացնում տարածաշրջանի երկրների միջև և սրում լարվածությունները:
«Իրանի Իսլամական Հանրապետությունը տարածաշրջանի որոշ երկրների արկածախնդրական քաղաքականությունները սխալ է համարում և այս գործընթացի շարունակումն անտարակույս ավելի կբարդացնի տարածաշրջանում, այդ թվում Պաղեստինում, Սիրիայում ու Եմենում առկա խնդիրները»․ ասել է Իրանի նախագահը:
Նշելով, որ Եմենի ճգնաժամը ռազմական լուծում չունի, նախագահ Ռոհանին ասել է. «Այս բախումների շարունակումը Եմենի աղքատ ժողովրդին ճնշման տակ է դրել և մեր բոլորի պարտականությունն է օգնել այս բռնահարված ժողովրդին»:
Հեռախոսազրույցի ժամանակ Կատարի Էմիրն ասել է. «Կատարը պնդում է, որ տարածաշրջանում առկա բոլոր տարաձայնությունները կարելի է կարգավորել միմիայն բանակցության ճանապարհով և ոչ մի երկիր չի կարող իր հայեցակետը պարտադրել մյուս երկրներին»:
