Մամուլի տեսություն.18.05.2020

Չնայած իրանական նավերի դեմ ուղղված ԱՄՆ-ի սպառնալիքներին, նավթամթերք տեղափոխող իրանական հինգ տանկերներ ուղևորվել են Վենեսուելա:

«Քեյհան» օրաթերթ

Իրանական հինգ տանկերներ գտնվում են Վենեսուելա տանող ճանապարհին

Նավագնացության հաստատությունների տեղեկատվության համաձայն՝ Իրանական նավթամթերք տեղափոխող ֆաքսոն տանկերն անցնելով Ջիբրալթարի նեղուցը, գտնվում է Լատինական Ամերիկայի ճանապարհին: Fortune, Petonia և Forrest տանկերներից հետո, սա իրանական բենզին կամ գազոյլ տեղափոխող չորրորդ տանկերն է, որ արևմտյան լրատվամիջոցների պնդմամբ  լատինական Ամերիկայի ուղղությամբ է շարժվում:

Իրանի պաշտոնյաները դեռևս չեն հաստատել և չեն հերքել դեպի Վենեսուելա վառելիք տեղափոխելու մասին լուրը:

Այնուամենայնիվ արևմտյան լրատվամիջոցներն ու պաշտոնյաները պնդում են, որ իրանական հինգ տանկերներ նավթամթերք են տեղափոխում Վենեսուելա:

 «Շահրվանդ» օրաթերթ

Իրանի մեծարգո առաջնորդի ելույթի հեռարձակումը՝ Երուսաղեմի օրվա միակ ծրագիրն է լինելու

Կորոնավիրուսի պանդեմիայի և  կիրառված սահմանափակումների պատճառով Իրանի իսլամական քարոզչության համակարգման խորհուրդը հրապարակել է հաղորդագրություն,որում հայտարարել է.«Իրանի իսլամական հեղափոխության մեծարգո առաջնորդը Երուսաղեմի  համաշխարհային օրվա առիթով հեռուստատեսության ուղիղ եթերում ելույթ է ունենալու: Գերապատիվ առաջնորդի ելույթից առավելագույն օգուտը քաղելու նպատակով, որևէ այլ միջոցառում տեղի չի ունենա»:

«Էըթեմադ» օրաթերթ

Կորոնավիրուսն էլ խտրական բնույթ է կրում

Օքսֆորդի համալսարանի կողմից կատարված հետազոտությունների արդյունքները ցույց են տալիս, որ այն թաղամասերում, որտեղ ապրում են աղքատներ, կորոնավիրուսով վարակվածների թիվն ավելի շատ է:

Առ այսօր ասում էին, թե կորոնավիրուսով վարակվում են հասարակության բոլոր խավերը, սակայն Բրիտանիայում վերջերս կատարված  հետազոտության արդյունքները ցույց են տալիս, որ աղքատ թաղամասերում կորոնավիրուսով վարակվածների թիվը չորս անգամ գերազանցում է հարուստների շրջանում վարակվածների թվին: Ուրեմն կարելի  է եզրակացնել, որ կորոնավիրուսը տարբեր վայրերում տարբեր կերպ է դրսևորվում:

«Ջամ-ե Ջամ» օրաթերթ

Հաքերային մի խումբ պնդում է, որ Թրամփի մասին կարևոր փաստաթղթեր է ձեռք բերել

Հաքերային մի  խումբ պնդում է, որ ձեռք է բերել փաստաթղթեր Դոնալդ Թրամփի մասին, որոնց հրապարակման դեպքում, այլևս ոչ ոք  չի ցանկանա, որ նա դառնա Միացյալ Նահանգների նախագահ: Այդ խումբը 42 միլիոն դոլար է պահանջել այդ գաղտնի տեղեկատվությունը չբացահայտելու համար:

«Քեյհան» օրաթերթ

Պենտագոն.«Խաղաղ օվկիանոսում  մենք զիջում ենք Չինաստանին»

Քաղաքական, ռազմական ու տնտեսական ոլորտներում Չինաստան-ԱՄՆ լարվածությունները սրվել են: Քաղաքական ոլորտում  Թրամփը Չինաստանին մեղադրում է կորոնավիրուսը տարածելու մեջ և սպառնացել է, որ կարող է խզել իր հարաբերությունները Չինաստանի հետ: ԱՄՆ-ն ուրբաթ օրը հայտարարել է, որ մտադիր է արգելափակել չինական հեռահաղորդակցական Huawei ընկերությանը էլեկտրոնային սարքավորումների համաշխարհային մատակարարումը:

Մյուս կողմից հաղորդումները վկայում  են, որ ամերիկյան ընկերությունները դուրս են գալիս Չինաստանից: Ինդոնեզիայի կառավարությունը մտադիր է իր երկրի տարածքի մի մասը տրամադրել Չինաստանից դուրս եկող ընկերությունների ներդրումներին: Իսկ ռազմական ոլորտում ևս Պենտագոնը սարսափում է Չինաստանի ռազմական հզորացումից:

1in.am

Քննարկվել է Հայաստանում 2021-2023 թթ. պետական միջնաժամկետ ծախսերի ծրագրի նախագիծը

Վարչապետ Նիկոլ Փաշինյանի գլխավորությամբ կառավարությունում տեղի է ունեցել խորհրդակցություն, որի ընթացքում քննարկվել է Հայաստանում 2021-2023 թթ. պետական միջնաժամկետ ծախսերի ծրագրի (ՄԺԾԾ) նախագիծը: Այս մասին հայտնեցին ՀՀ վարչապետի աշխատակազմի տեղեկատվության և հասարակայնության հետ կապերի վարչությունից։

Մանրամասն անդրադարձ է կատարվել նախագծի մշակման հիմքում դրված հիմնական մակրոտնտեսական կանխատեսվող ցուցանիշներին և հարկաբյուջետային շրջանակին: Նշվել է, որ նախագծում դիտարկվել են տարբեր սցենարներ՝ պայմանավորված ճգնաժամային պայմաններով և հնարավոր զարգացումներով:

Վարչապետ Փաշինյանը հանձնարարել է նախագծի վերաբերյալ ներկայացված առաջարկությունները մանրամասն քննարկել՝ այն լրամշակելու համար, և կարևորել կապիտալ ծախսային ծրագրերի իրականացման ուղղությամբ հետևողական քայլերի իրականացումն ու նոր նախագծերի մշակմանը միտված աշխատանքները: «Պետք է ամեն ինչ անել, որպեսզի իրադարձությունները զարգանան լավատեսական սցենարով»,- նշել է կառավարության ղեկավարը:

Armenpress.am

«Ամոթի միջանցք». Բելգիայում բժիշկներն իրենց վրդովմունքն են հայտնել վարչապետին

Բելգիայում հիվանդանոցներից մեկն այցելած վարչապետ Սոֆի Վիլմեսին բժիշկները դիմավորել են՝ կազմակերպելով «ամոթի միջանցք»:

«Արմենպրես»-ի հաղորդմամբ, այս մասին տեղեկացնում է «Ռուսաստան 24»-հեռուստաալիքը:

Վարչապետը եկել էր հիվանդանոց իր աջակցությունը հայտնելու բուժանձնակազմին և ապշել այդպիսի ընդունելությունից: Երբ ավտոշարասյունը մոտեցել է հիվանդանոցին, բժիշկներն ու բուժքույրերը շրջվել են մեջքով, որպեսզի ցույց տան իրենց վրդովմունքը համաճարակի ժամանակ իշխանությունների գործողությունների առնչությամբ: Ակցիային մասնակցել է 120 մարդ:

Բելգիայում բուժաշխատողները տևական ժամանակ աշխատում են առանց գրաֆիկի, և նրանք դեռ չունեն հավելյալ ֆինանսական աջակցություն: Այդ հարցը կառավարությունում քննարկվել է ապրիլի սկզբին, սակայն դեռ որոշում չի կայացվել ոչ գումարի չափի, ոչ վճարումների ժամկետի վերաբերյալ:

Tert.am

Brent նավթի գինն աճել է. մեկ բարելի համար այն գերազանցել է 34 դոլարը

Նավթի առաջատար ապրանքանիշների համաշխարհային գները շարունակում են աճել: Այս մասին տեղեկացնում է korrespondent.net կայքը:

Այսպիսով՝ Brent տեսակի նավթի հուլիսի մատակարարման ֆյուչերսները լոնդոնյան ICE բորսայում աճել են 6% -ով և հասել բարելի համար 34,45 դոլարի: Սա ամենաբարձր ցուցանիշն է ապրիլի 9-ից սկսած:

Իր հերթին, WTI նավթի գինն աճել է 7,76%-ով` հասնելով 31,81 դոլարի:

Ավելի վաղ Նավթ արտահանող երկրների կազմակերպությունը (ՕՊԵԿ+) հայտարարել էր, որ նավթային ճգնաժամի ամենածանր ժամանակահատվածն արդեն անցյալում է:

Ինչպես ավելի վաղ տեղեկացրել էր Tert.am-ը, ՕՊԵԿ+-ի երկրները մայիսի 1-ից սկսել են իրականացնել նավթի արդյունահանման ծավալների կրճատման վերաբերյալ նոր համաձայնության պայմանները: Համաձայն ձեռք բերված պայմանավորվածության՝ այս տարվա մայիս-հունիս ամիսներին նավթի արդյունահանման կրճատումը կկազմի օրական 9.7 միլիոն բարել: Հետո հուլիսից մինչև դեկտեմբեր կրճատումը պետք է հասնի օրական 7.7 միլիոն բարելի: Ընդ որում՝ 2021-ի սկզբից մինչև 2022-ի մայիս նավթի արդյունահանումը պետք է նվազի մինչև օրական 5.8 միլիոն բարել:

Tert.am

Եվրոպական երկրները շարունակում են չեղարկել կորոնավիրուսի ֆոնին հայտարարած սահմանափակումները. վերաբացում են դպրոցները, սրճարաններն ու ժամանցի այլ վայրերը

Եվրոպական երկրները շարունակում են չեղարկել կորոնավիրուսի ֆոնին հայտարարած սահմանափակումները, գրում է The Guardian-ը։

Իտալիայում վերաբացվում են բարերը, սրճարանները, ռեստորանները և վարսավիրանոցները՝ սոցիալական հեռավորության խիստ միջոցառումների պահպանմամբ։

Մինչդեռ Իսպանիայում երկրի բնակչության գրեթե երեք քառորդն անցել է սահմանափակումների չեղարկման երկրորդ փուլին, որն իսպանացիներին թույլ կտա մինչև 10 հոգանոց խմբերով հավաքվել սրճարաններում և ռեստորաններում։

BBC-ի փոխանցմամբ՝ Բելգիան առաջիկա օրերին կբացի տարրական և միջնակարգ դպրոցները․ երկրի թանգարաններն ու կենդանաբանական այգիները նույնպես կբացեն իրենց դռները, ընդ որում՝ տոմսերը հնարավոր կլինի ամրագրել միայն առցանց եղանակով՝ մեծաքանակ այցելուներից խուսափելու համար։

Հունաստանում վերաբացվել է Ակրոպոլիսը․ եվրոպական այս երկրում միջնակարգ դպրոցների աշակերտները նույնպես վերադառնում են դպրոցներ։

Պորտուգալիայում, ինչպես և Լեհաստանում իրենց աշխատանքն են վերսկսել ռեստորանները, սրճարաններն ու ժամանցի այլ վայրերը։