Մեկնաբանություն.Իրանը հակամարտ կողմերին զգուշացրել է Ղարաբաղյան պատերազմի հետևանքների կապակցությամբ
Լեռնային Ղարաբաղում (Nagorno-Karabakh) թեժ մարտեր են ընթանում Հայաստանի և Ադրբեջանի Զինված ուժերի միջև:
Դառը պատերազմի բոցերը թեժացել ու տարածվել են տարածաշրջանում: Պատերազմի պատճառները պետք է վերլուծել տարբեր դիտանկյուններից:
Ինչ պատճառով էլ որ սանձազերծված լինի այս պատերազմը, այն ունենալու է լայնամասշտաբ ու մտահոգիչ հետևանքներ: Հակամարտության երկու կողմերը միմյանց մեղադրում են այն սկսելու մեջ: Հակամարտության սրմաբնը զուգահեռ, Իրանի սահմանային շրջաններում նույնպես պայթյունների ձայներ են լսվում:
Օրերս Հայաստանի և Ադրբեջանի միջև ընթացող ռազմական գործողությունների ընթացքում մի քանի արկեր ու հրթիռներ են ընկել երկու երկրի հետ Իրանի սահմանամերձ գյուղերում: վիրավորվել է հինգ տարեկան երեխա:
Իրանի Խոդաաֆարին շրջկենտրոնի կուսակալ Ալի Ամիրի Ռադն ԻՍՆԱ-ին տված հարցազրույցում ասել է.«Հայաստանի և Ադրբեջանի միջև ԼՂ հակամարտության տարածքում կիրառված արկերից ավելի քան 10-ն ընկել է Իրանի հյուսիս-արևմտյան շրջաններում: Ղարաբաղյան հակամարտության տարածքում Հայաստանի ու Ադրբեջանի միջև ընթացող մարտական գործողություններն սկսվելուց ի վեր, ավելի քան 30 արկ է ընկել այս շրջանում: Իհարկե դա դիտավորյալ չի եղել: Այնուամենայնիվ Իրանի իսլամական հանրապետությունը մեծ զգայունությամբ և լրջությամբ հետևում է իր սահմանակից շրջաններում զարգացումներին: Իրանի իսլամական հանրապետության ռազմական ուժերը նույնպես լիովին պատրաստ են և անհրաժեշտության դեպքում վճռականորեն կպատասխանեն ցանկացած ներխուժման»:
Իրանի ԱԳ նախարարության խոսնակն զգուշացնելով Ղարաբաղյան հակամարտության կողմերին, ասել է.«Իրանը չի հանդուրժի յուրաքանչյուրի կողմից ցանկացած ներխուժում իր տարածք»:
Խաթիբզադեն ապա հակամարտ կողմերին զգուշացրել է Իրանի տարածքը հարգելու կապակցությամբ:
Պարզից էլ պարզ է, որ ոչ մի երկիր ու ժողովուրդ չի շահել պատերազմից և պատերազմների արդյունքները եղել են անմեղ մարդկանց կորուստը և ենթակառուցվածքների ոչնչացումը: Հարավային Կովկասը նաև զգայուն տարածաշրջան է, և էներգետիկայի առումով կենսական նշանակություն ունի Եվրոպայի համար, որտեղ կործանարար կորոնավիրուսից բացի, պատերազմը շատերին կներքաշի այս հակամարտության մեջ:
Իրանի ԱԳ նախարար Մոհամմադ Ջավադ Զարիֆը թվիթերյան իր միկրոբլոգում գրել է.«Իրանն ուշադիր հետևում է ԼՂ-ում ընթացող մտահոգիչ բռնություններին: Մենք կոչ ենք անում անհապաղ դադարեցնել ռազմական գործողությունները և երկխոսություն սկսել տարաձայնությունները կարգավորելու համար:Մեր հարևանները մեր գերակայությունն են, և մենք պատրաստ ենք լավ հիմք ստեղծել երկխոսության համար: Մեր տարածաշրջանն այսօր խաղաղության կարիք ունի»:
Այս տեսանկյունից հակամարտության կողմերին ուղղված Իրանի նախազգուշացումը վկայում է պատերազմն ընդլայնվելու և դրա հետևանքների կապակցությամբ Իրանի մտահոգությունների մասին: Իրանի Իսլամական Հանրապետությունը համոզված է, որ տարաձայնությունների կարգավորումը հնարավոր կլինի միայն տարածաշրջանի երկրների և հարևան երկրների միջև երկխոսության ու համագործակցության միջոցով: Ըստ այդմ, իր տարածաշրջանային դիվանագիտության մեջ Իրանն անհրաժեշտության դեպքում քայլեր կձեռնարկի բախումների դադարեցման և սպառնալիքների չեզոքացման ուղղությամբ: