Մամուլի տեսություն 05.10.2020
Իրանի խորհրդարանի պատգամավորը հայտնել է, որ Լեռնային Ղարաբաղում Հայաստանի և Ադրբեջանի միջև ընթացող պատերազմի հետևանքով 15 հրթիռ է ընկել Խոդաաֆարին շրջանում։ Վիրավորվել է երկու իրանցի:
«Էըթեմադ» օրաթերթ
Ղարաբաղյան պատերազմի հետևանքով 15 հրթիռ է ընկել Իրանի Խոդաաֆարին շրջանում. Կա երկու վիրավոր
Իրանի խորհրդարանում Քալեյբարի, Խոդաաֆարինի և Հորանդի ներկայացուցիչը հայտնել է, որ Ղարաբաղում ընթացող պատերազմի հետևանքով 15 հրթիռ է ընկել Խոդաաֆարին շրջանում:
«Ցավոք երկու հրթիռները դիպչել են Խոդաաֆարինի Փարվիզ Խանլու գյուղի երկու շենքերին ու ոչնչացրել դրանք: Վիրավորվել է երկու մարդ»,-նշել է նա:
Հոսեյն Հաթամին հավելել է.«Ազգային անվտանգության հանձնաժողովի նախագահի առաջին տեղակալը և Իսլամական խորհրդարանի մի խումբ պատգամավորներ, այցելել են Արևելյան Ատրպատական նահանգի Խոդաաֆարին և Արդաբիլ նահանգի Փարսաբադ քաղաքներ, քննարկելու երկրի սահմանային շրջաններում Ադրբեջանի և Հայաստանի միջև ընթացող ռազմական գործողությունների ազդեցությունները»:
«Քեյհան» օրաթերթ
Ղարաբաղյան ճգնաժամը սրվել է. Կողմերը հրթռիակոծում են միմյանց քաղաքները
Երեկ հայկական բանակը Տոչկա հրթիռներով թիրախավորել է Ադրբեջանի երկրորդ քաղաք Գյանջան: Ադրբեջանական կողմը շարունակում է հրետանակոծել ԼՂ-ի մայրաքաղաք Ստեփանակերտը: Հրապարակված լուսանկարները վկայում են խաղաղ քաղաքացիներին հասցված վնասների մասին:
ԼՂ-ի տարածքի նախագահ Արայիկ Հարությունյանը երեկ ասել է.«Իմ հրամանով այսօր Պաշտպանության բանակը Գյանջա քաղաքում տեղակայված ռազմական օբյեկտների վնասազերծման նպատակով հասցրել է մի քանի հրթիռային հարված: Այս պահի դրությամբ հանձնարարել եմ դադարեցնել կրակը՝ քաղաքացիական բնակչության շրջանում անմեղ զոհերից խուսափելու համար»,
Ավելի վաղ ստացված լուրերի համաձայն՝ Թուրքիան հազարավոր ահաբեկիչներ է տեղափոխել Ղարաբաղ:
Հաղորդվում է նաև, որ Թուրքիայից դեպի Բաքու չվերթներն ավելացել են, նույնիսկ Լիբիայից դեպի Բաքու չվերթներ են իրականանում:
«Ջամե Ջամ» օրաթերթ
Սպիտակ տան աշխատակազմի ղեկավարն անվճար ծխախոտ է բաժանել Թրամփի կողմնակիցներին
ԱՄՆ նախագահ Դոնալդ Թրամփը կորոնավիրուսով վարակվելու պատճառով գտնվում է Վաշինգտոնի Վալտեր Ռիդ հիվանդանոցում: Սպիտակ տան աշխատակազմի ղեկավար Մարկ Միդոուզը հիվանդանոցի դրսում հավաքված Թրամփի կողմնակիցներին անվճար ծխախոտ է բաժանել և նրանց շնորհակալություն հայտնել:
«Իրան» օրաթերթ
Բայդենի հաղթանակը կործանարար կլինի Իսրայելի համար
Թել Ավիվում ԱՄՆ դեսպան Դեյվիդ Ֆրիդմանը պնդում է, որ ԱՄՆ 2020 թ. ընտրություններում դեմոկրատ թեկնածու Ջո Բայդենի հաղթանակը կլինի ի շահ Իրանի և ի վնաս Իսրայելի ու Պարսից ծոցի մերձափնյա արաբական երկրների:
«ԱՄՆ-ի առաջիկա նախագահական ընտրություններում դեմոկրատ թեկնածու Ջո Բայդենի հաղթանակը նշանակում է Իրանի նկատմամբ ԱՄՆ-ի քաղաքականության փոփոխություն, որից կտուժեն Իսրայելն ու Պարսից ծոցի մերձափնյա երկրները», - ասել է Ֆրիդմանը:
«Ինչպես գիտեք, Բայդենը Բարաք Օբամայի վարչակազմի կաբինետի անդամ էր, որը բանակցեց Իրանի հետ և համաձայնեց Իրանի հետ համաձայնագրի կնքմանը: Դոնալդ Թրամփն այդ համաձայնագիրն անվանեց ամերիկյան պատմության մեջ ամենավատ միջազգային համաձայնագիրը, և ես այդ հարցում համաձայն եմ Թրամփի հետ»,ասել է Ֆրիդմանը:
Armenpress.am
Երևան է ժամանել ռուսական հատուկ նշանակության ինքնաթիռը
Ռուսական Ил-96-300 ինքնաթիռը, որը ներառված է «Ռուսաստան» հատուկ թռիչքային ստորաբաժանման մեջ, ժամանել է Երևան: Այս մասին հայտնում է Lenta.ru-ն, վկայակոչելով Flightradar հարթակի տվյալները և նշելով, որ հայտնի չէ, թե ով և ինչ նպատակով է հոկտեմբերի 5-ին այդ չվերթով ժամանել Երևան:
«Ռուսաստան» հատուկ ստորաբաժանումն ապահովում է երկրի պաշտոնատար անձանց, Ռուսաստանի հատուկ ծառայությունների և Զինված ուժերի բարձրաստիճան ներկայացուցիչների տեղափոխումը և ենթարկվում է նախագահի աշխատակազմին:
«Արմենպրես»-ի հետ զրույցում ՀՀ վարչապետի մամուլի խոսնակ Մանե Գևորգյանը հաստատեց ՌԴ-ից հատուկ բորտի ժամանման լուրը։
Հատուկ բորտը վայրէջք է կատարել «Զվարթնոց» օդանավակայանում:
Aysor.am
ՆԱՏՕ-ն կոչ է անում դադարեցնել կրակը Ղարաբաղում և բանակցություններ սկսել
ՆԱՏՕ-ն մտահոգված է Ղարաբաղյան հակամարտության գոտում խաղաղ բնակիչների մահվան կապակցությամբ:Դաշինքի գլխավոր քարտուղար Յենս Ստոլտենբերգը կոչ է արել դադարեցնել կրակը և բանակցություններ սկսել, հայտնում է Ռիա Նովոստին:
«Խնդիրը ռազմական լուծում չունի», - Թուրքիայի ԱԳՆ ղեկավար Մևլութ Չավուշօղլուի հետ Ստամբուլում կայացած մամուլի ասուլիսում ընդգծել է ՆԱՏՕ-ի գլխավոր քարտուղարը:
«Մեզ շատ է անհանգստացնում Ղարաբաղում տիրող իրավիճակը: Մենք տեսնում ենք, որ խաղաղ բնակիչներ են զոհվում: Այս հակամարտությունը վտանգ է ներկայացնում բոլոր ոլորտների, այդ թվում՝ էներգետիկայի համար: Սա շատ վտանգավոր իրավիճակ է ամբողջ տարածաշրջանի, ինչպես նաև դաշինքի անդամների համար: Մենք հակամարտության բոլոր կողմերին կոչ ենք անում անհապաղ դադարեցնել պատերազմը և նստել բանակցությունների սեղանի շուրջ», - ասել է Ստոլտենբերգը:
1in.am
Պեսկովը բացատրել է, թե ինչու Պուտինը դեռ չի խոսել Թուրքիայի և Ադրբեջանի նախագահների հետ
ՌԴ նախագահի մամուլի քարտուղար Դմիտրի Պեսկովը բացատրել է, թե ինչու երկրի ղեկավար Վլադիմիր Պուտինը դեռ չի խոսել Թուրքիայի և Ադրբեջանի իր գործընկերների՝ Թայիփ Էրդողանի և Իլհամ Ալիևի հետ, հաղորդում է Gazeta.Ru-ն:
Նախագահի օգնականը նշել է, որ ամեն ինչ կախված է «նախագահի աշխատանքային գրաֆիկից և նպատակահարմարությունից»:
«Դա ամենևին չի նշանակում, որ ռուսական կողմը աշխատանքային շփումների որոշակի պակաս ունի: Ընդհակառակը, նախարար Լավրովը մշտական կապի մեջ է Ադրբեջանի և Թուրքիայի իր գործընկերների հետ»,- պատասխանել է Պեսկովը:
Հայերեն ռադիոալիքին հետևեք սոցցանցերում
https://www.instagram.com/parstodayarmenian/
https://twitter.com/radio_armenian
https://www.reddit.com/user/armradio/
https://urmedium.com/c/armenianradio
