Մամուլի տեսություն – 14.04.2023
Այսօր՝ ուրբաթ, Ղոդսի միջազգային օրն է: Այս օրը, Իրանի Իսլամական Հանրապետության հիմնադիր և Ղոդսի օրվա ստըղծող Իմամ Խոմեյնին այն նշեց որպես ճնշվածների և ամբարտավանների դիմակայության օր:
Իրան օրաթերթ
Ամերիկացի վերլուծաբան. Ղոդսի օրվա երթը ցույց է տալիս, որ Պաղեստինը մոռացված չէ
Ամերիկացի վերլուծաբանն ու փորձագետը հայտարարեց, որ Ղոդսի համաշխարհային օրվա երթը ցույց է տալիս, որ Պաղեստինը մոռացված չէ, և ասաց. «Այս երթը աշխարհի գիտակցության մեջ է պահում պաղեստինցի ժողովրդի տառապանքն ու ճնշումը և թույլ չի տալիս, որ այս հարցը մոռացվի։
«Կեղծ քարոզչություն, սուտ և կեղծ խորհրդանիշներ. ինչպես է Ամերիկան արդարացնում իր պատերազմները» գրքի հեղինակ Ռոբերտ Ֆանտինան Ռամադան սուրբ ամսվա վերջին ուրբաթ օրը Ղոդսի համաշխարհային օրվա երթի կարևորության մասին ասել է. «Այս երթը աշխարհի կառավարություններին ցույց է տալիս իրենց ժողովրդի դիրքորոշումն այս հարցում»։
Ջավան օրաթերթ
Մոսկվա. Ռուսաստանի և ՆԱՏՕ-ի միջև հակամարտության վտանգը մեծանում է
Նշելով, որ իր երկիրն ունի բավականաչափ ռազմական հզորություն, որպեսզի թույլ չտա ՆԱՏՕ-ի գերակայությունը Բալթիկ ծովում, Ռուսաստանի փոխարտգործնախարարն ասել է, որ Ռուսաստանի և ՆԱՏՕ-ի շփման գծի 1200 կիլոմետրի ավելացումը բազմապատկել է բախման ռիսկերը։
ՌԴ փոխարտգործնախարար Ալեքսանդր Գրոշկոն հինգշաբթի առավոտյան «Իզվեստիա» թերթին տված հարցազրույցում ասել է, որ Ռուսաստանն ունի բավականաչափ ռազմական ուժ, որպեսզի թույլ չտա ՆԱՏՕ-ին գերիշխել Բալթիկ ծովում և այն վերածել «ՆԱՏՕ-ի ծովի»։ .
Ջամե Ջամ օրաթերթ
Իսրայելի փլուզման շրջանն արագացել է
Տարածաշրջանային հարցերով փորձագետ Հասան Հանիզադեն, անդրադառնալով օկուպացված տարածքներում տեղի ունեցող զարգացումներին և Ղոդսի զավթիչ ռեժիմի ներքին կառուցվածքում ներքին հակամարտություններին, Jam Jam Online-ի թղթակցին ասել է. «Սիոնիստական ռեժիմի ներքին և տարածաշրջանային պայմանների դաշտային վերլուծությունն՝ երկու քաղաքական և անվտանգության տեսանկյուններից ցույց է տալիս, որ սա 7 տասնամյակ ճնշող օկուպացիայից հետո վարչակարգը թեւակոխել է փլուզման շրջափուլ՝ չնայած ունենալով արևմտյան աշխարհի միջազգային աջակցությունը»։
Համշահրի օրաթերթ
Ամերիկայի բացահայտված սցենարները; Պուտինի՞, թե՞ Զելենսկու մահը
Համաձայն գաղտնազերծված ամերիկյան փաստաթղթերի՝ Վաշինգտոնը կենտրոնանում է չորս անկանխատեսելի սցենարների վրա, թե ինչպես դրանք կազդեն ուկրաինական պատերազմի ընթացքի վրա։
The New York Times-ը գրել է. «ԱՄՆ պաշտպանության հետախուզական գործակալությունը նախանշել է չորս «անսպասելի» սցենար և ինչպես դրանք կազդեն Ուկրաինայի հակամարտության ընթացքի վրա։ Այս հիպոթետիկ սցենարները ներառում են Ռուսաստանի նախագահ Վլադիմիր Պուտինի և Ուկրաինայի նախագահ Վլադիմիր Զելենսկու մահը, Ռուսաստանի զինված ուժերում ղեկավարության հեռացումը և, ի վերջո, Ուկրաինայի հարձակումը Կրեմլի վրա:
tert.am
ԱԽ քարտուղարը Լուի Բոնոյին է ներկայացրել Տեղ համայնքի մոտակայքում Ադրբեջանի կողմից իրականացված սադրանքը
ԱԽ քարտուղար Արմեն Գրիգորյանն ապրիլի 14-ին ընդունել է Կովկասյան բանակցությունների հարցերով ավագ խորհրդական, ԵԱՀԿ Մինսկի խմբի ամերիկացի համանախագահ Լուի Բոնոյին: Այս մասին հայտնում են ՀՀ ԱԽ գրասենյակից։
Ա. Գրիգորյանը ներկայացրել է ադրբեջանական զինված ուժերի կողմից ապրիլի 11-ին Տեղ համայնքի մոտակայքում իրականացրած սադրանքը՝ ընդգծելով, որ նման քայլերի միակ նպատակը հայ-ադրբեջանական խաղաղ բանակցություններին ուղղված ջանքերն ի չիք դարձնելն է: Այս համատեքստում Լ. Բոնոն շեշտել է կառուցողական քայլերի իրականացման և խաղաղության գործընթացին հավատարիմ մնալու անհրաժեշտությունը՝ հետագա էսկալացիաներից խուսափելու համար:
ԱԽ քարտուղարը վերահաստատել է հայկական կողմի հանձնառությունը բանակցային գործընթացին՝ ներկայացնելով առկա խնդիրների կարգավորման հարցում Հայաստանի մոտեցումները:
tert.am
Հայաստանի և Ռուսաստանի ԱԳ նախարարներն առանձնազրույցի ընթացքում քննարկել են տարածաշրջանային անվտանգությանը և կայունությանը վերաբերող հարցեր
ՀՀ արտաքին գործերի նախարար Արարատ Միրզոյանն ապրիլի 14-ին առանձնազրույց է ունեցել ՌԴ արտաքին գործերի նախարար Սերգեյ Լավրովի հետ։ Հանդիպումը կայացել է Սամարղանդում անցկացվող ԱՊՀ ԱԳ նախարարների խորհրդի նիստի շրջանակներում:
Զրուցակիցները քննարկել են տարածաշրջանային անվտանգությանը և կայունությանը վերաբերող հարցեր:
ԱԳ նախարարները մտքեր են փոխանակվել Հայաստան-Ադրբեջան հարաբերությունների կարգավորման, սահմանազատման և սահմանային անվտանգության, տարածաշրջանում բոլոր տնտեսական և տրանսպորտային կապերի ապաշրջափակման, Լեռնային Ղարաբաղի հիմնախնդրի շուրջ:
Արարատ Միրզոյանը ներկայացրել է ապրիլի 11-ին ՀՀ Սյունիքի մարզի Տեղ գյուղի հատվածում ադրբեջանական զինված ուժերի կողմից իրականացված սադրանքի մանրամասներ՝ նշելով, որ այն Ադրբեջանի ընդհանուր ագրեսիվ քաղաքականության հերթական դրսևորումն էր:
Անդրադարձ է կատարվել Ադրբեջանի կողմից Լաչինի միջանցքի՝ արդեն չորս ամիս շարունակվող արգելափակման հետևանքով Լեռնային Ղարաբաղում ստեղծված իրավիճակին։ Ընդգծվել է Լաչինի միջանցքի արգելափակման վերացման անհրաժեշտությունը՝ 2020թ. նոյեմբերի 9-ի եռակողմ հայտարարությամբ ստանձնած պարտավորություններին համապատասխան:
Հանդիպման ընթացքում ԱԳ նախարարներն անդրադարձել են նաև երկկողմ օրակարգի հարցերի։
news.am
ՌԴ-ն հույս ունի, որ Երեւանի եւ Բաքվի միջեւ խաղաղության պայմանագիրը հնարավորինս շուտ կստորագրվի․ Մատվիենկո
Ռուսաստանը հուսով է, որ Հայաստանի եւ Ադրբեջանի միջեւ խաղաղության պայմանագիրը կստորագրվի որքան հնարավոր է շուտ։ Այս մասին հայտարարել է Դաշնության խորհրդի խոսնակ Վալենտինա Մատվիենկոն՝ Սանկտ Պետերբուրգում ԱՊՀ միջխորհրդարանական վեհաժողովի նիստից հետո, հաղորդում է «Սպուտնիկը»։
«Ռուսաստանն արել է հնարավոր ամեն ինչ եւ շարունակում է անել ամեն ինչ, որպեսզի խաղաղության պայմանագիրը հնարավորինս շուտ ստորագրվի եռակողմ համաձայնագրի շրջանակներում, որը ժամանակին ստորագրվել է երեք պետությունների ղեկավարների կողմից։ Հույս ունենք, որ դա տեղի կունենա որքան հնարավոր է շուտ»,- ասել է Մատվիենկոն։
Նշենք, որ ապրիլի 14-ին Սամարղանդում ԱՊՀ Արտաքին գործերի նախարարների խորհրդի նիստի շրջանակում հանդիպել են Հայաստանի եւ Ռուսաստանի արտաքին գործերի նախարարներ Արարատ Միրզոյանը եւ Սերգեյ Լավրովը։ Հանդիպման ընթացքում երկու երկրների արտաքին քաղաքական գերատեսչությունների ղեկավարները նշել են բոլոր ուղղություններով հայ-ադրբեջանական հարաբերությունների կարգավորմանն ուղղված ջանքերի ակտիվացման կարեւորությունը՝ 2020-2022 թվականներին Ռուսաստանի, Հայաստանի եւ Ադրբեջանի ղեկավարների համաձայնություններին համապատասխան։
news.am
Հավանաբար, սխալ են թարգմանել․ Զախարովան պատասխանել է ՔՊ քարտուղարին
ՌԴ ԱԳՆ պաշտոնական ներկայացուցիչ Մարիա Զախարովան արձագանքել է «Քաղաքացիական պայմանագիր» խմբակցության քարտուղար Արթուր Հովհաննիսյանի հայտարարությանն առ այն, որ իրեն հասկանալի չէ, թե ինչու է Ռուսաստանը պարզաբանում պահանջում Եվրոպայում ԱՄՆ–ի զորավարժություններին հայկական կողմի մասնակցության վերաբերյալ։ «Պետք է նշել, որ նա, ակնհայտորեն, հիմնվում է իր հորինած ձեւակերպման վրա ու զարմանում դրանից, կամ էլ նրա համար սխալ են թարգմանել»,-ասվում է ՌԴ ԱԳՆ-ի թելեգրամյան ալիքում։
armenpress.am
Բաքուն ահաբեկչության է ենթարկում ԼՂ-ի բնիկ հայ բնակչությանը. ՀՀ ԱԺ նախագահն ԱՊՀ մասնակից պետությունների միջխորհրդարանական վեհաժողովի լիագումար նիստում
ԵՐԵՎԱՆ, 14 ԱՊՐԻԼԻ, ԱՐՄԵՆՊՐԵՍ: Կոչ ենք անում միջազգային հանրությանը եւ տարածաշրջանում խաղաղությամբ ու կայունությամբ հետաքրքրված բոլոր գործընկերներին հասցեական հայտարարությունների եւ հստակ քայլերի միջոցով դատապարտել Ադրբեջանի ագրեսիվ գործողությունները Հայաստանի Հանրապետության եւ Լեռնային Ղարաբաղի հայերի նկատմամբ, եւ դրանով իսկ կանխել իրավիճակի հետագա էսկալացիան, որը կարող է տարածվել աշխարհի այլ տարածաշրջաններ: «Արմենպրես»-ի փոխանցմամբ՝ այս մասին հայտարարեց Ալեն Սիմոնյանը՝ ԱՊՀ մասնակից պետությունների միջխորհրդարանական վեհաժողովի լիագումար նիստի շրջանակում ունեցած իր ելույթում:
