Խաթիբզադե. Հարստացված ուրանը չի տեղափոխվի ԱՄՆ

Իրանի փոխարտգործնախարարը հայտարարել է, որ Թեհրանն իր հարստացված ուրանը չի փոխանցելու ԱՄՆ-ին և որ դա քննարկման ենթակա չէ։

Pars Today-ի փոխանցմամբ՝ Իրանի փոխարտգործնախարար Սաիդ Խատիբզադեն Associated Press-ին տված հարցազրույցում հայտարարել է, որ Թեհրանը հարստացված ուրանը չի փոխանցի ԱՄՆ-ին։ 
Նա նաև ասել է, որ Իրանի և ԱՄՆ-ի միջև բազմաթիվ հաղորդագրություններ են փոխանակվել, սակայն ամերիկյան կողմը շարունակում է պնդել այն պահանջների վրա, որոնք Թեհրանը համարում է «չափազանցված»։
Անդրադառնալով բանակցությունների գործընթացին՝ Խաթիբզադեն հավելել է. «Մենք դեռ չենք հասել իրական հանդիպում անցկացնելու փուլին, քանի որ ամերիկացիները որոշ հարցերի շուրջ չեն նահանջել իրենց ծայրահեղ դիրքորոշումներից»։