Բարհամ Սալեհ. Միացյալ Նահանգները խախտել է Իրաքի ինքնիշխանությունը
Իրաքի նախագահը դատապարտել է երկուշաբթի առավոտյան Սիրիայի հետ սահմանի մոտակայքում Հաշդ ալ-Շաաբի ուժերի դեմ ԱՄՆ-ի հարձակումը և դա որակել որպես Իրաքի ինքնիշխանության խախտում:
Middle East News կայքի տեղեկացմամբ, երեքշաբթի օրը, հաղորդագրություն տարածելով, Բարհամ Սալեհն ընդգծել է, որ այդ լարվածությունները Իրաքի ազգային անվտանգության և ինքնիշխանության խախտման վառ օրինակներ են և խնդիրներ են առաջացնում անվտանգությունն ու կայունությունը պաշտպանելու ազգային ջանքերի ճանապարհին:
Իրաքի նախագահի գրասենյակի հաղորդագրության մեջ ասված է.«Բաղդադը չի ցանկանում հակամարտության թատերաբեմ լինել, քանի որ դա միջազգային պայմանագրերին դեմ է համարում»:
Իրաքի նախագահը հավաստիացրել է, որ այդ հարձակումները և նախորդ միջադեպերը, ներառյալ՝ Արբիլի և այլ վայրերի հրթիռակոծությունն անընդունելի և անօրինական գործողություններ են, որոնք վնասում են երկրի բարձրագույն շահերին:
Հայտարարությունը բոլոր կողմերին կոչ է անում զսպվածություն դրսևորել և զերծ մնալ ցանկացած գործողությունից, որը կարող է վնասել Իրաքի և տարածաշրջանի անվտանգությանը և կայունությանը:
