Թալիբները հասան նավթին
Աֆղանստանի հյուսիսում մեկնարկել է նավթի և գազի արդյունահանումը։
Աֆղանստանի հյուսիսային Սարե Փոլ նահանգ կատարած այցի ընթացքում թալիբների ժամանակավոր կառավարության մի շարք պաշտոնյաներ Ղաշղարի շրջանում կատարել են նավթի և գազի հորերի բացումը: Այդ մասին հայտնում է Աֆղանստանի Բախթար պետական լրատվական գործակալությունը:
Թալիբանի պաշտոնյաները հայտնել են, որ նավթի հանքավայրից ստացված հասույթը կօգտագործվի Աֆղանստանի վերականգնման համար՝ առաջնահերթությունը տալով Սարե Փոլ նահանգին:
Մոլլա Աբդուլ Ղանի Բարադարն իր գոհունակությունն է հայտնել Սարե Փոլ նահանգում նավթի և գազի օբյեկտների շահագործման մեկնարկի կապակցությամբ: Նա ասել է.«Նավթի հանքավայրերից գոյացող հասույթով Աֆղանստանի եկամտին օրական կավելանա 150 հազար դոլար»։
Սարե Փոլ և Ֆարյաբ նահանգներն ունեն երեք նավթային հանքավայրեր՝ Ղաշղարի, Քոմի շուկա և Զումրոդսայ անուններով, որոնց ապացուցված պաշարների քանակն ըստ պաշտոնական վիճակագրության, գնահատվում է 87 մլն բարել։