Տասնյակ զոհեր ու վիրավորներ Ստամբուլի գիշերային ակումբի դեմ հարձակման հետևանքով
Ձմեռ պապիկի հագուստ կրող երկու զինված անձինք նոր տարվա գիշերը ներխուժելով Ստամբուլի գիշերային ակումբներից մեկը կրակել են ներկաների վրա:
«Ֆրանս Պրես»-ի հաղորդման համաձայն, կիրակի առավոտյան Ստամբուլի Օրթաքոյի տարածքում գտնվող գիշերային մի ակումբի դեմ իրականացված զինված հարձակման հետևանքով զոհվել է առնվազն 35 և վիրավորվել է 40 մարդ:
Ստամբուլի կուսակալ Վասիփ Շահինը հայտարարել է, որ հարձակումը ահաբեկչական է եղել: Նա հավելել է, որ զոհերից մեկը ոստիկանության ուժերի սպա է եղել:
Վիրավորները հիվանդանոց են փոխադրվել:
Հաղորդման համաձայն, դեպքի վայրում ներկաներից որոշներն իրենց կյանքը փրկելու համար նետվել են Բոսֆորի նեղուցը:
Ականատեսների վկայության համաձայն գրոհայինները արաբերեն լեզվով են խոսել:
Թուրքիայի ԶԼՄ-ների հայտարարության համաձայն, դեպքի ժամանակ գիշերային ակումբում ներկա է եղել առնվազն 700 մարդ:
2016 թվականի դեկտեմբերի 10-ին Ստամբուլում Թուրքիայի ոստիկանության ուժերի դեմ ուղղված երկու ռմբադրությունների հետևանքով զոհվեց 44 մարդ և տասնյակ ուրիշներ վիրավորվեցին:
