Թուրքիան գերմանացի պատգամավորներին թույլ չի տվել այցելել «Ինջիրլիք» ավիաբազա
Թուրքիան մերժել է Գերմանիայի խորհրդարանի մի խումբ պատգամավորների «Ինջիրլիք» ավիաբազա այցելելու դիմումը:
Գերմանիայի ԱԳ նախարարությունը այդ մասին հայտարարել է.«Գերմանացի պատգամավորների «Ինջիրլիք» ավիաբազա այցելության արգելումը կարող է հանգեցնել երկու երկրների միջև լարվածությանը»:
Գերմանացի պատգամավորների «Ինջիրլիք» ավիաբազա նախատեսված այցից մեկ օր առաջ Թուրքիան Գերմանիայի Արտգործնախարարությանը տեղեկացրել է, որ հնարավոր չէ այցելել ավիաբազա:
Գերմանիայի խորհրդարանի պաշտպանության հանձնաժողովի մի խումբ պատգամավորներ պատրաստվում էին երեքշաբթի օրը այցելել «Ինջիրլիք» ավիաբազա և հանդիպում ունենալ բազայում տեղակայված զինվորականների հետ:
Թուրքիայի նման քայլերը պատճառ են դարձել, որ գերմանացիները մտածեն իրենց ավիաբազան այլ երկիր տեղափոխելու մասին:
Գերմանիայի բանակի հրամանատարության շրջանում ընթացող քննարկումները ցույց են տալիս, որ ռազմական առումով Հորդանանում, Քուվեյթում և Կիպրոսում կան ռազմաբազաներ, որոնցից այդ երկիրը կարող է օգտվել իր զինծառայողներին տեղակայելու համար:
