Ռուսաստանը ողջունում է նավթի համաշխարհային առաջարկի նվազեցման նախագիծը
Ռուսաստանը հայտարարել է, որ Մոսկվան ողջունում է OPEC plus -ի տեխնիկական հանձնախմբի առաջարկը՝ նվազեցնել նավթի համաշխարհային առաջարկը՝ պահանջարկի վրա կորոնավիրուսի բացասական ազդեցությունը նվազեցնելու համար:
Ռոյտերս լրատվական գործակալության հաղորդման համաձայն, Մեքսիկա այցելած Սերգեյ Լավրովը, Մեխիկոյում կայացած մամլո ասուլիսում ասել է.«Մենք ողջունում ենք այդ առաջարկը: ՌԴ նախագահ Վլադիմիր Պուտինը ևս վերջերս Սաուդյան Արաբիայի հետ քննարկումներ է անցկացրել համաշխարհային տնտեսության վրա կորոնավիրուսի հետևանքների կապակցությամբ: Նա նշել է, որ վիրուսն անշուշտ բացասաբար է ազդելու նավթի շուկայի վրա»:
«Տեխնիկական համատեղ հանձնաժողովը», որը ծառայում է որպես խորհրդատվական մարմին՝ ՕՊԵԿ-ի և ոչ-անդամ երկրների համար, առաջարկել է 600,000 բարելով կրճատել նավթի օրական առաջարկը:
OPEC plus խումբը կազմում են ՕՊԵԿ-ը և այն ոչ-անդամ երկրները, որոնց գլխավորում է Ռուսաստանը:
Փորձագետները համոզված են, որ կորոնավիրուսի պատճառով, նավթի օրական պահանջարկը նվազելու է 300-500 հազար բարելով:
