Խաղաղօվկիանոսյան տարածաշրջանում ԱՄՆ գլխավոր դաշնակիցը մտերմանում է Ռուսաստանի հետ. WSJ
Մինչ ԱՄՆ-ը պատժամիջոցներ է սահմանում Ռուսաստանի դեմ, Ճապոնիան՝ Վաշինգտոնի գլխավոր դաշնակիցը, Խաղաղօվկիանոսյան տարածաշրջանում, ավելի սերտ կապեր է փնտրում Մոսկվայի հետ:
Այս մասին գրում է The Wall Street Journal-ը Ճապոնիայի վարչապետ Սինձո Աբեի և ՌԴ նախագահ Վլադիմիր Պուտինի հանդիպումից առաջ:
«Աբեի համար խնդիրն այն է, որ նա, ձգտելով Պուտինի հետ բարեկամության, ընկնում է Վաշինգտոնի և Մոսկվայի միջև դիվանագիտական խաչաձև կրակի մեջ»,- գրում է պարբերականը:
Հանդիպումը նախատեսված է այս ուրբաթ Սոչիում: Ռուսաստանի և Ճապոնիայի ղեկավարները կհանդիպեն 13-րդ անգամ: Միաժամանակ պարբերականն ուշադրություն է դարձնում, որ ԱՄՆ նախագահ Բարաք Օբամայի հետ Աբեն միայն 7 անգամ է հանդիպել: Դա ապացուցում է, որ նոր էջը ռուս-ճապոնական հարաբերություններում գլխավոր դիվանագիտական առաջնայնությունն է Ճապոնիայի վարչապետի համար, նշում է պարբերականը:
Ռուսաստանին և Ճապոնիային միավորում են մի շարք ընդհանուր շահեր: Էներգետիկ ռեսուրսներով ոչ հարուստ Ճապոնիան ձգտում է դիվերսիֆիկացնել նավթի և գազի իր աղբյուրները: Իսկ Ռուսաստանը գլոբալ հումքային ճգնաժամի ֆոնին նոր ներդրումների կարիք ունի: Ըստ WSJ-ի՝ Մոսկվայի ևս մեկ նպատակն է՝ ցույց տալ, որ չնայած պատժամիջոցներին՝ ինքը մեկուսացման մեջ չէ:
Բացի դրանից՝ Աբեն բազմիցս հասկացրել է, որ ուզում է Կուրիլյան կղզիների շուրջ տարածքային վեճը լուծել նախքան իր պաշտոնից հեռանալը: Այս տարի նա ծրագրում է Պուտինին Ճապոնիա հրավիրել և արդյունքում ինչ-որ համաձայնության հասնել այդ հարցում:
Տոկիոն նաև անհանգստությամբ է վերաբերվում հարևան Չինաստանին, որն ամրապնդում է իր դիրքերը: Հենց Չինաստանի, ինչպես նաև Հյուսիսային Կորեայի մեջ է Ճապոնիան ներկայումս տեսնում իր համար գլխավոր սպառնալիքը:
Ճապոնիային հատկապես անհանգստացնում է իրավիճակը Հարավչինական ծովում, որտեղ միանգամից մի քանի երկիր վիճարկում է մի շարք կղզիների տարածքային կարգավիճակը:
«Ռուսաստանի չեզոքությունն այդ իրավիճակում Ճապոնիայի շահերից է բխում: Տոկիոն ուզում է, որ Մոսկվան խուսափի զենքի ցանկացած մատակարարումից, որը կարող էր փոխել ուժերի հավասարակշռությունը տարածաշրջանում»,- մեկնաբանում է իրավիճակը Tokyo Foundation հետազոտական կենտրոնի Ռուսաստանի հարցերով փորձագետ Տայսուկե Աբիրուն:
