Թուրքիան երկարաձգել է Ադրբեջանում իր ռազմական առաքելությունը
Երեքշաբթի օրը Թուրքիայի խորհրդարանը հաստատել է Ադրբեջանում այդ երկրի զինվորականների առաքելությունը ևս մեկ տարով երկարաձգելու նախագիծը:
Կառավարության ներկայացրած նախագծում, որը ստորագրել է նախագահ Ռեջեփ Թայիփ Էրդողանը, նշվում է, որ շարունակվելու է նաև Հայաստանի և Ադրբեջանի միջև հրադադարի մոնիտորինգի թուրք-ռուսական համատեղ կենտրոնի աշխատանքը:
Թուրքիան համոզված է, որ այս համատեղ կենտրոնի միջոցով օգնում է ամրապնդել տարածաշրջանային անվտանգությունը և վստահություն հաստատել Բաքվի և Երևանի միջև։
Ադրբեջանում իր ռազմական ներկայությունը երկարաձգելու Թուրքիայի որոշումը կայացվում է ՌԴ նախագահ Վլադիմիր Պուտինի, Ադրբեջանի նախագահ Իլհամ Ալիևի և Հայաստանի վարչապետ Նիկոլ Փաշինյանի եռակողմ հանդիպումից մեկ օր անց։
Հանդիպման ամփոփիչ հայտարարության մեջ ասվում է. «Պայմանավորվածություն է ձեռք բերվել, որ գործադրվելու են բոլոր ջանքերը՝ մնացած հարցերի, այդ թվում՝ հումանիտար հարցերի վերաբերյալ արագ լուծման հասնելու համար»։
