Ալիևը Ռուսաստանին մեղադրել է ադրբեջանական ինքնաթիռի կործանման իրական պատճառը «կոծկելու» մեջ
Այն փաստը, որ կործանված ինքնաթիռի իրանն ամբողջովին ծակծկված էր, օրակարգից իսպառ հանում է թռչունների երամի հետ բախման վարկածը, տեղական հեռուստատեսությանը տված հարցազրույցում հայտարարել է Ադրբեջանի նախագահ Իլհամ Ալիևը։
Ըստ Ալիևի, «Ռուսաստանի որոշ շրջանակներ գերադասեցին հավատարիմ մնալ այս վարկածին»։
«Մեզ վշտացնող և զարմացնող պահերից մեկն այն էր, որ ռուսաստանյան պաշտոնական կառույցները ինչ-որ գազի բալոնի պայթյունի վարկած առաջ քաշեցին։ Այսինքն՝ սա բացահայտ ցույց տվեց, որ ռուսաստանյան կողմը ցանկանում է կոծկել հարցը, և դա, իհարկե, ոչ մեկին պատիվ չի բերում»,- ասել է նա։
Ընդգծելով, որ «իհարկե, մեր ինքնաթիռը միտումնավոր չի խոցվել», Ալիևն ասել է, որ «մեղքն ընդունելը, բարեկամ երկիր համարվող Ադրբեջանից անհապաղ ներողություն խնդրելը և դա հանրությանը հայտնելը ձեռնարկվող անհրաժեշտ քայլերը կլինեին»։
«Ցավոք, առաջին երեք օրերին մենք ոչինչ չլսեցինք Ռուսաստանից, բացի զառանցական վարկածներից»,- ասել է Ալիևը։
«Մեր պահանջները հստակ փոխանցել ենք ռուսաստանյան կողմին, դրանք փոխանցվել են դեռ դեկտեմբերի 27-ին։ Որո՞նք են դրանք։ Նախ՝ ռուսաստանյան կողմը պետք է ներողություն խնդրի Ադրբեջանից։ Երկրորդ՝ ընդունի իր մեղքը։ Երրորդ՝ պատժի մեղավորներին, քրեական պատասխանատվության ենթարկի նրանց և փոխհատուցում վճարի ինչպես պետությանը, այնպես էլ տուժած ուղևորներին ու անձնակազմի անդամներին։ Սրանք են մեր պայմանները: Դրանցից առաջինը երեկ արդեն կատարվել է։ Հուսով եմ, որ մնացած պահանջները նույնպես կբավարարվեն»,- ասել է Ալիևը։
Հիշեցնենք, որ ադրբեջանական ավիաուղիների ինքնաթիռի վթարը տեղի է ունեցել դեկտեմբերի 25-ին Ակտաուի մոտ։
ՌԴ նախագահ Վլադիմիր Պուտինը դեկտեմբերի 28-ին զանգահարել է Ալիևին և ներողություն խնդրել «Ռուսաստանի օդային տարածքում ողբերգական միջադեպի պատճառով», հաղորդում է Կրեմլի մամուլի ծառայությունը։
news.am