Ամերիկյան դարի ավարտը․ Հավերժական պատերազմներ և Վաշինգտոնի հզորության անկումը

Pars Today - Ավստրալիացի վերլուծաբանը, քննարկելով Արևմտյան Ասիայում և Լատինական Ամերիկայում ԱՄՆ-ի ռազմական ու քաղաքական տեղաշարժերի  հնարավոր հետևանքները, զգուշացրել է, որ «հավերժական պատերազմների» կրկնությունը Արևմտյան Ասիայում կարող է հանգեցնել Վաշինգտոնի համաշխարհային հզորության անկմանը և նրա դաշինքների թուլացմանը Արևելյան Ասիայում։

Ավստրալիացի հետազոտող և գրող Ջեֆրի Ռոբերտսոնը «Pearls and Irritation» վերլուծական կայքում արած գրառման մեջ նշել  է.«Արևմտյան Ասիայում ցանկացած նոր պատերազմ կարող է անտանելի մակարդակի հասցնել ԱՄՆ դաշինքների արժեքը և վտանգել երկրի դիրքերը Արևելյան Ասիայում»։

Անդրադառնալով Հարավային Կորեայի կողմից Անվտանգության խորհրդում Իրանի դեմ պատժամիջոցների երկարաձգման վերաբերյալ ձեռնպահ քվեարկությանը, Ռոբերտսոնը այս դիրքորոշումը համարել է Սեուլի կողմից Վաշինգտոնի հետ դաշինքի գինը գիտակցելու նշան,  հավելելով. «Արևմտյան Ասիայում ևս մեկ պատերազմ ոչ միայն կհանգեցնի Արևելյան Ասիայում էներգետիկ ճգնաժամի, այլև կսպառնա ԱՄՆ-ի դաշնակիցների ռազմավարական անկախությանը»։

Իր վերլուծության մեջ Ռոբերտսոնը թվարկել է ԱՄՆ-ի գործողությունների երեք հնարավոր սցենար Արևմտյան Ասիայում և Լատինական Ամերիկայում՝ հաջողություն, ձախողում և միջին վիճակ։ Նրա կարծիքով, երեք դեպքերում էլ կան «ամերիկյան դարի ավարտի» նշաններ։

Ավստրալիացի վերլուծաբանը շեշտել է, որ Վիետնամի, Իրաքի և Աֆղանստանի փորձը ցույց է տվել, որ Վաշինգտոնի մեծ ծրագրերը հազվադեպ են հանգեցնում կայունության և, ի վերջո, Միացյալ Նահանգներին կանգնեցնում են  քաղաքական, տնտեսական և բարոյական ծանր ծախսերի առջև։

Ռոբերտսոնը գրում է. «Արևմտյան Ասիայում յուրաքանչյուր նոր պատերազմ Վաշինգտոնին ավելի խորն է ներքաշում հոգնածության և մաշվածության ճահճի մեջ՝ ստիպելով իր դաշնակիցներին, այդ թվում՝ Հարավային Կորեային, ԱՄՆ-ին հետևելու  և իր սեփական ազգային շահերը պաշտպանելու միջև դժվար ընտրություն կատարել։ Նման պայմաններում Ամերիկայի ագրեսիվ քաղաքականության շարունակումը կարող է հանգեցնել «նրա համաշխարհային կայսրության աստիճանական փլուզմանը»։