Իրանը կարող է բնապահպանական վճարներ գանձել Հորմուզի նեղուցով անցնող նավերից
Իրանի շրջակա միջավայրի պաշտպանության գործակալության միջազգային կենտրոնը հայտարարել է, որ Հորմուզի նեղուցով անցնող նավերից բնապահպանական վճարների գանձումը իրավական հիմք ունի միջազգային ծովային իրավունքի շրջանակներում և կարող է օգտագործվել Պարսից ծոցին պատճառված բնապահպանական վնասը փոխհատուցելու համար։
Pars Today-ի փոխանցմամբ՝ կենտրոնը, հղում անելով նավթի աղտոտվածության աճին, օտարերկրյա ռազմական նավատորմերի գործունեությանը և Պարսից ծոցի ու տարածաշրջանի կղզիների զգայուն էկոհամակարգերին հասցված վնասին, ընդգծել է, որ ծովային միջավայրի պաշտպանության և վերականգնման համար ֆինանսական միջոցներ տրամադրելը դարձել է անհրաժեշտություն։
Ըստ այս հաղորդման՝ «անվնաս անցման» իրավական համակարգում նեղուցներին հարակից երկրները կարող են որոշակի վճարներ գանձել ծովային ծառայություններ մատուցելու կամ կանոնակարգերի խախտումների հետևանքով պատճառված վնասը փոխհատուցելու դիմաց, ինչը նախադեպ ունի նաև միջազգային ընթացակարգերում։
Շրջակա միջավայրի պաշտպանության գործակալության միջազգային կենտրոնը իրավական հիմքից զուրկ է համարել անցնող նավերից բնապահպանական վճարների գանձման անօրինականության վերաբերյալ պնդումները և հայտարարել, որ այս գործընթացը կիրառելի է ճանաչված միջազգային կանոնների շրջանակներում։