Մոսկվան կոչ է անում վերջ դնել ՄԱԿ-ում Արևմուտքի գերիշխանությանը

Քննադատելով ԱՄՆ-ի ներկայիս գործունեությունը, Մոսկվան հանդես է եկել կազմակերպությունում լուրջ բարեփոխումներ իրականացնելու կոչով և հայտարարել, որ ապագա գլխավոր քարտուղարը պետք է հակազդի ՄԱԿ-ի որոշումների կայացման համակարգերի վրա արևմտյան երկրների ազդեցությանն ու գերիշխանությանը։

Pars Today-ի հաղորդմամբ՝ ՌԴ ԱԳՆ միջազգային կազմակերպությունների վարչության տնօրեն Կիրիլ Լոգվինովը նշել է, որ ՄԱԿ-ի նոր գլխավոր քարտուղարը պետք է առաջնահերթ ուշադրություն դարձնի Անտոնիո Գուտերեշի պաշտոնավարման ընթացքում թույլ տրված սխալների և բացթողումների վերացմանը։ Նրա խոսքով՝ այդ ուղղությամբ առաջին քայլը պետք է լինի ՄԱԿ-ի քարտուղարության վրա արևմտյան պաշտոնյաների և մոտեցումների գերակշռության սահմանափակումը։
Ռուս պաշտոնյան հավելել է, որ ՄԱԿ-ի որոշ կառույցներում առկա քաղաքական կողմնակալությունը նվազեցրել է կազմակերպության կարողությունը՝ միջազգային ճգնաժամերի կառավարման և կարգավորման հարցերում հանդես գալու որպես անաչառ միջնորդ։
Լոգվինովը շեշտել է, որ նման միտումների շարունակությունը կարող է բացասաբար անդրադառնալ ՄԱԿ-ի հեղինակության և արդյունավետության վրա, մինչդեռ կառավարման և որոշումների կայացման մեխանիզմների բարեփոխումը կնպաստի կազմակերպության ավելի արդյունավետ դերակատարմանը համաշխարհային հակամարտությունների կարգավորման գործում։