Ղալիբաֆ. Իսլամաբադի համաձայնությունը դարձավ ԱՄՆ-ի պարտության հռչակագիրը
Իրանի իսլամական խորհրդարանի նախագահ Մոհամմադ Բաղեր Ղալիբաֆը Բաքվում հայտարարել է, որ Թեհրանի և Վաշինգտոնի միջև ձեռք բերված «Իսլամաբադի համաձայնությունը» դարձել է «ԱՄՆ-ի պարտության հռչակագիրը»:
Վկայակոչելով IRNA-ն, Pars Today-ը հաղորդում է, որ Ղալիբաֆը Իսլամական համագործակցության կազմակերպության անդամ երկրների խորհրդարանների միության (PUIC) 20-րդ համաժողովում նշել է, որ Միացյալ Նահանգների և սիոնիստական ռեժիմի կողմից Իրանի դեմ սանձազերծված պատերազմը չի հասել իր նպատակներին՝ Իրանի ժողովրդի և զինված ուժերի դիմադրության շնորհիվ։ Նրա խոսքով՝ հակառակորդը ստիպված է եղել նահանջել թե՛ ռազմի դաշտում, թե՛ բանակցային գործընթացում։
Իրանի խորհրդարանի նախագահը շեշտել է, որ «Իսլամաբադի համաձայնությունը» ճնշումների արդյունք չէ, այլ Իրանի ժողովրդի դիմադրության և տոկունության պտուղը, որն ի վերջո վերածվել է «ԱՄՆ-ի պարտության հռչակագրի»։
Ղալիբաֆը նաև ընդգծել է, որ տարածաշրջանի անվտանգությունը պետք է ապահովեն հենց տարածաշրջանի երկրները, իսկ Արևմտյան Ասիայում օտարերկրյա ռազմական ուժերի ներկայությունը ոչ միայն չի նպաստել կայունությանը, այլ դարձել է լարվածության և ճգնաժամերի հիմնական պատճառներից մեկը։
Նա կոչ է արել իսլամական երկրներին ընդլայնել տնտեսական, առևտրային, գիտական և անվտանգության ոլորտներում համագործակցությունը՝ նշելով, որ տարածաշրջանի ապագան պայմանավորված է ինտեգրմամբ, տրանսպորտային ու հաղորդակցական միջանցքների փոխկապակցմամբ, համատեղ զարգացմամբ և շարունակական քաղաքական երկխոսությամբ, այլ ոչ թե մաշեցնող մրցակցությամբ և հարևան երկրների թուլացման քաղաքականությամբ։