Իրանի ԱԳ նախարարի տեղակալ․ Հորմուզի նեղուցում ցանկացած ռազմական արկածախնդրություն հետևանքներ կունենա
Իրանի Իսլամական Հանրապետության արտաքին գործերի նախարարի իրավական և միջազգային հարցերով տեղակալ Քազեմ Ղարիբաբադին, արձագանքելով Հորմուզի նեղուցի վերաբերյալ Ֆրանսիայի և Բրիտանիայի վերջին հայտարարությանը, ընդգծել է, որ այս ռազմավարական ջրային ուղին արտատարածաշրջանային ռազմական ուժերի ուժի ցուցադրման վայր չէ։
Նա X սոցիալական ցանցում հրապարակած գրառմամբ նախազգուշացրել է, որ Իրանի Իսլամական Հանրապետությունը, որպես պատասխանատու պետություն և Հորմուզի նեղուցի անվտանգության երաշխավոր, ուշադիր հետևում է այս զգայուն տարածաշրջանում ցանկացած ռազմական տեղաշարժին և զգուշացնում դրա հնարավոր հետևանքների մասին։
Pars Today-ի հաղորդմամբ՝ Ղարիբաբադին նշել է, որ Հորմուզի նեղուցի անվտանգությունը պետք է ապահովեն առափնյա պետությունները, իսկ արտատարածաշրջանային դերակատարների ներկայությունը կամ լարվածություն հրահրող գործողությունները որևէ կերպ չեն նպաստի տարածաշրջանի կայունությանը։ Նա հավելել է, որ այն ուժերը, որոնք այս ջրային ուղում կդիմեն ռազմական արկածախնդրության, ամբողջությամբ պատասխանատվություն են կրելու իրենց գործողությունների բոլոր հետևանքների համար։
Իրանի ԱԳ նախարարի իրավական և միջազգային հարցերով տեղակալն այս դիրքորոշումը որակել է որպես լուրջ նախազգուշացում և ընդգծել աշխարհի կարևորագույն էներգետիկ տարանցիկ ուղիներից մեկի՝ Հորմուզի նեղուցի անվտանգության և կայունության պահպանման անհրաժեշտությունը՝ տարածաշրջանի երկրների համագործակցությամբ և առափնյա պետությունների պատասխանատվության նկատմամբ հարգանքի միջոցով։