Ձերբակալվել են ԱՄՆ Սենատում իրանցի երեխաների սպանության դեմ բողոքող ցուցարաները
ԱՄՆ Սենատում կառավարության ռազմական բյուջեի քննարկման ընթացքում մի խումբ ամերիկացի քաղաքացիներ բողոքի ակցիա են իրականացրել՝ դատապարտելով իրանցի և պաղեստինցի երեխաների սպանությունները, որոնց համար պատասխանատու են համարում ԱՄՆ-ին և Իսրայելին։ Ոստիկանությունը նիստերի դահլիճից հեռացրել է ակցիայի մասնակիցներին, իսկ մի քանիսիմ ձերբակալել։
Հաղորդվում է, որ ցուցարարները կրել են Մինաբ քաղաքում զոհված երեխաների լուսանկարները և կոչ են արել դադարեցնել իրանցի և պաղեստինցի երեխաների դեմ իրականացվող հարձակումներն ու սպանությունները։
Բողոքի ակցիան տեղի է ունեցել այն պահին, երբ Սենատի նիստին մասնակցում էր ԱՄՆ պաշտպանության նախարար Փիթ Հեգսեթը՝ ներկայացնելով վարչակազմի ռազմական բյուջեի ավելացման հիմնավորումները։
Հեգսեթի խոսքով՝ Միացյալ Նահանգները մինչ այժմ ավելի քան 37 միլիարդ դոլար է ծախսել Իրանի դեմ ռազմական գործողությունների վրա։ Նա նաև կոչ է արել օրենսդիրներին հնարավորինս շուտ հաստատել Պենտագոնի համար նախատեսված լրացուցիչ 87 միլիարդ դոլարի ֆինանսավորումը։ Ըստ նախարարի՝ այդ գումարից 67 միլիարդ դոլարը նախատեսվում է ուղղել Մերձավոր Արևելքում ԱՄՆ ռազմական գործողությունների ֆինանսավորմանը։
ԱՄՆ ռազմական բյուջեի ավելացման առաջարկը քննադատության է արժանացել մի շարք քաղաքացիական կազմակերպությունների և հակապատերազմական ակտիվիստների կողմից։ Նրանք պահանջում են դադարեցնել Վաշինգտոնի ռազմական քաղաքականությունը և վերջ տալ այն գործողություններին աջակցելուն, որոնք, նրանց գնահատմամբ, հանգեցնում են խաղաղ բնակիչների, հատկապես երեխաների զոհվելուն։