Խաթիբզադե․ Իրանի վրա նոր հարձակումը կհանգեցնի տարբեր և անկանխատեսելի պատասխանի
Իրանի արտաքին գործերի նախարարի տեղակալը նախազգուշացրել է, որ Իրանի դեմ պատերազմի կրկնության դեպքում ագրեսորները կպատժվեն, և տարածաշրջանային հավասարակշռությունն այնպես կփոխվի, որ նախկին իրավիճակին վերադառնալն այլևս հնարավոր չի լինի։
Ինչպես հաղորդում է Pars Today-ը, Սաիդ Խաթիբզադեն Լիբանանի Al Jadeed հեռուստաալիքին տված հարցազրույցում ընդգծել է, որ Իրանը պատրաստ է դիմակայելու ցանկացած սցենարի, սակայն դիվանագիտական լուծումը համարել է հակամարտությունների ավարտի միակ ուղին։
Քննադատելով ԱՄՆ-ի և սիոնիստական ռեժիմի քաղաքականությունը՝ նա հայտարարել է, որ Թեհրանը ջանքեր է գործադրում պատերազմը կանխելու համար, սակայն ցանկացած նոր հարձակում կհանգեցնի տարբեր և անկանխատեսելի պատասխանի։
Խաթիբզադեն նաև շրջափակումն ու տնտեսական ճնշումը բնութագրել է որպես Իրանին կապիտուլյացիայի ենթարկելու անարդյունավետ գործիքներ և պահանջել է դադարեցնել պատերազմը բոլոր ճակատներում, այդ թվում՝ Լիբանանում։
Իրանի արտաքին գործերի նախարարի տեղակալը, ընդգծելով, որ Թեհրանը հարգում է Լիբանանի ներքին որոշումները, առաջարկել է, որ տարածաշրջանի երկրները համատեղ մասնակցությամբ մշակեն անվտանգության անկախ մեխանիզմներ։ Նա նաև անհրաժեշտ է համարել Եմենի շրջափակման վերացումը և ռազմական բախումների դադարեցումը՝ ընդգծելով ճգնաժամի քաղաքական կարգավորման անհրաժեշտությունը։