Turqia kërkesë Greqisë për zgjidhjen e mosmarrëveshjeve

"Turqia do të vazhdojë të mbrojë me vendosmëri të drejtat e saj dhe të drejtat e turqve qipriotë në Mesdheun Lindor. Greqia duhet t'i përgjigjet pozitivisht thirrjes sonë për dialog", thonë nga MPJ-ja turke

Turqia përsëriti sot thirrjen e saj për dialog me Greqinë në lidhje me aktivitetet e saj të kërkimit sizmik në Mesdheun Lindor. Ministria e Punëve të Jashtme (MPJ) të Turqisë tha se Greqia lëshoi një deklaratë tjetër "duke përsëritur pretendimet dhe kundërshtimet e njohura të anijes Oruç Reis në lidhje me aktivitetin e kërkimit sizmik të kryer në shelfin kontinental turk". "Këto pretendime dhe kundërshtime u përgjigjën me gjashtë deklarata të bëra nga Ministria jonë që nga korriku i kaluar", thonë nga MPJ-ja turke. "Turqia do të vazhdojë të mbrojë me vendosmëri të drejtat e saj dhe të drejtat e turqve qipriotë në Mesdheun Lindor. Greqia duhet t'i përgjigjet pozitivisht thirrjes sonë për dialog, në vend që të lëshojë deklarata pas çdo Navtex-i të shpallur nga Turqia", tha ajo. Navtex është një sistem i komunikimit detar që lejon anijet të informojnë anijet e tjera për praninë e tyre në një zonë, si dhe informacione të tjera. Sipas njoftimit, anija për kërkime sizmike Oruç Reis, do të jetë e shoqëruar nga anijet Ataman dhe Cengiz Han në punimet sizmike që janë zgjatur deri më 29 nëntor në Mesdheun Lindor. Anija kërkimore sizmike Oruç Reis do të kryejë lloje të ndryshme të kërkimeve gjeologjike, gjeofizike, hidrografike dhe oqeanografike, veçanërisht për kërkimet e burimeve natyrale. Në muajin gusht, Turqia rifilloi kërkimin e energjisë në Mesdheun Lindor pasi Greqia dhe Egjipti nënshkruan një marrëveshje të kontestueshme të përcaktimit detar, duke prishur gjestin e vullnetit të mirë të Turqisë me ndalimin e kërkimeve. Turqia shpalli marrëveshjen greko-egjiptiane "të pavlefshme" dhe autorizoi anijen Oruç Reis që të vazhdojë aktivitetet në zonën brenda shelfit kontinental të Turqisë. Turqia vazhdimisht ka kundërshtuar përpjekjet e Greqisë për deklarimin e saj si zonë ekonomike ekskluzive të bazuar në ishuj të vegjël pranë brigjeve turke, duke shkelur interesat e Turqisë, vendit me vijën më të gjatë bregdetare në Mesdhe. Ankara zyrtare gjithashtu ka thënë se burimet e energjisë pranë ishullit të Qipros duhet të ndahen në mënyrë të drejtë midis Republikës Turke të Qipros Veriore (TRNC) dhe administratës së Qipros Greke.