Vuçiq shpërfaq qëllimin për incidente në veri dhe fajëson Kurtin

Me deklaratën e tij se është i shqetësuar për informacionin (e rremë) se tre serbë u rrahën nga pjesëtarët e forcave speciale të Policisë së Kosovës në afërsi të vendkalimit kufitar Bërnjak, presidenti serb Aleksandar Vuçiq ka treguar qëllimin e vërtetë të bllokimit të rrugës nga serbët lokalë.

Mediat serbe, të kontrolluara nga Vuçiqi, shpejt e kanë humbur durimin në pritje që pjesëtarët e Policisë së Kosovës të bien pre e provokimeve të serbëve lokalë në veri dhe të përdorin forcën ndaj atyre që kanë bllokuar rrugën dhe po ruajnë aty, duke fyer pjesëtarët e policisë. Portali serb në veri të Mitrovicës publikoi sot lajmin e rremë se pjesëtarët e Policisë së Kosovës kanë rrahur tre banorë serbë në vendkalimin kufitar në Bërnjak. Ky lajm u demantua nga Policia e Kosovës, por kjo nuk e ka penguar presidentin serb Vuçiq që të reagojë dhe të akuzojë Qeverinë Kurti dhe të kërkojë reagimin e NATO-s dhe BE-së. Siç transmetojnë mediat serbe, Vuçiq tha se është i shqetësuar, pasi ka marr informatën se pjesëtarët e Policisë së Kosovës, kanë rrahur tre serbë në afërsi të vendkalimit kufitar në Bërnjak. “Është çështje për NATO-n dhe për BE-në pse e lejojnë këtë. Ne u treguam atyre qartë se cilët janë kufijtë dhe deri në çfarë mase do të durojmë dhunën e Albin Kurtit dhe forcave të tij. Këtë e dinë evropianët dhe amerikanët, ne e kemi thënë me shumë saktësi. Dhe e kemi thënë shumë saktësisht se cilat janë lëvizjet tona dhe në çfarë radhe po shkojnë”, u tha Vuçiq gazetarëve pas samitit rajonal në Budapest. Ai gjithashtu theksoi se “përpjekjet e reja për të rrezikuar ose përndjekur fizikisht serbët nuk do të ndodhin”. Presidenti serb gjithashtu tha se është mirë që ende vlen Marrëveshja e Brukselit dhe shtoi se nesër pret mbajtjen e takimit urgjent të Ekipit Drejtues rreth Bashkësisë së Komunave Serbe. Policia e Kosovës sot ka demantuar lajmin e medieve serbe, të cilat pretendonin se pjesëtarë të Policisë së Kosovës, kishin rrahur disa banorë serbë në Bërnjak. Përmes një komunikate për medie, policia ka sqaruar se nuk ka pasur asnjë ndalim, por as kontakt me ndonjë protestues në pikë kalim kufitar. Tri ditë që kur Qeveria e Kosovës vendosi masën e reciprocitetit për targat e automjeteve nga Serbia, serbët lokalë kanë bllokuar rrugët që çojnë në pikë kalimet kufitare në Jarinjë dhe Bërnjak në veri të Kosovës. Njësitë speciale të Policisë së Kosovës janë vendosur në këto dy lokacione, derisa dy shtetet shkëmbyen akuza e kundër akuza pas këtyre zhvillimeve. Pavarësisht se situata ka qenë e qetë, shfaqja e xhandarmërisë serbe në afërsi të territorit të Kosovës ka ngritur shqetësime. Në afërsi të Jarinjës, në territorin e Serbisë xhandarmëria serbe është vendosur në disa pika të larta duke vrojtuar njësitet e Policisë së Kosovës. Edhe njësitet speciale të Policisë së Kosovës janë treguar mjaft vigjilente, duke vëzhguar lëvizjet e xhandarmërisë por që nuk është shënuar ndonjë incident. Institucionet ndërkombëtare kanë bërë thirrje për ulje të tensioneve.