Vendimi për Shqipërinë dhe Maqedoninë e Veriut, pas votimit në Shkup

Me 68 vota pro e asnjë kundër, teksa deputetet e opozitës e bojkotuan procesin e votimit, propozimi francez u miratua në parlamentin maqedonas, duke i hapur kështu rrugën avancimit të Maqedonisë së Veriut drejt integrimit të mëtejshëm europian, e për rrjedhojë edhe Shqipërisë së mbetur peng e mosmarrëveshjeve të Shkupit me Sofjen.

Deputetët votuan për shtatë konkluzione të hartuara nga grupi parlamentar i Lidhjes Social Demokrate (LSDM), që kanë të bëjnë me garancitë për gjuhën dhe identitetin maqedonas. “Kuvendi detyron Qeverinë që përmes delegacioneve në bisedime, t’i përmbahet përcaktimit për respektimin pa kushte të gjuhës, identitetit dhe kulturës së popullit maqedonas, si elemente për të cilat nuk negociohet me BE-në. Në kornizën e bisedimeve gjuha maqedonase të jetë pa sqarime, pa shtesa dhe pa fusnotë”, thuhet mes tjerash në konkluzionet e prezantuara nga Grupi Parlamentar i LSDM-së. Miratimi vjen pas tre ditë debatesh të ashpra në Kuvend, tensionesh e deri dhe tentativash për përplasje fizike. Gjatë gjithë debatit, deputetët e partisë opozitare, VMRO-DPMNE, i penguan deputetët e partive në pushtet që të mbajnë fjalimet e tyre. Propozimi francez parashikon kapërcimin e dallimeve mes Shkupit dhe Sofjes lidhur me gjuhën maqedonase, identitetin dhe të kaluarën historike ndërkohë që pala bullgare kërkon nga pala maqedonase që të përfshijë edhe pakicën bullgare në preambulën e Kushtetutës, si të barabartë me popujt e tjerë. Ka qenë i menjëhershëm reagimi i kryetares së Komisionit Europian, Ursula von der Leyen, e cila ishte dhe vetë në Shkup ku iu drejtua me një fjalim parlamentit atje, ne përpjekje për të bindur të pranonin zhbllokimin e rrugës së anëtarësimit, të cilën Maqedonia e Veriut e kërkon prej gati dy dekadash  ndërsa Shqipëria ka 8 vjet që e pret. Edhe Komisioneri i Zgjerimit Oliver Varhelyi e përshëndeti këtë moment, e madje në një moment të parë ai shkroi se negociatat do të hapeshin të martën, por më pas postoi një mesazh pa afate kohore duke u fokusuar tek përshëndetja e rezultatit të votimit, ndërsa tha se e presin me padurim hapjen e negociatave. Edhe kancelari gjerman Olaf Scholz shkroi menjëherë në Twitter se kjo votë i hap rrugën konferencave të anëtarësimit të Bashkimit Europian me Maqedoninë e Veriut dhe Shqipërinë. Ne ju duam si anëtarë të Bashkimit Europian dhe do të jemi pranë jush gjatë gjithë rrugës, ka shkruar ai. Ngjashëm ka reaguar edhe presidenti i Këshillit Evropian, Charles Michel. “E ardhmja jonë është e përbashkët dhe ne ju mirëpresim me duar të hapura”, shkroi ai në rrjetet sociale, duke shtuar se votimi i 16 korrikut ishte një hap i madh i Maqedonisë së Veriut drejt BE-së. Kryeministri i Shqipërisë, Edi Rama, ka mirëpritur vendimin e Shkupit dhe po ashtu ka paralajmëruar se javën e ardhshme Shqipëria do të nisë negociatat e anëtarësimit. Mësohet ndërkohë se Maqedonia është ftuar në Bruksel të martën, ndërsa delegacioni shqiptar mbërrin atje të hënën pasdite.