Mjekët e EULEX-it ekzaminojnë të paraburgosurin Dejan Pantiq
Një ekip mjekësor i EULEX-it, të shtunën në mbrëmje, i ka bërë një ekzaminim shëndetësor ish-policit të arrestuar, Dejan Pantiq.
Këtë e konfirmoi shefi i EULEX-it në Kosovë, Lars-Gunnar Wigemark.
“Me kërkesë të autoriteteve përgjegjëse të Kosovës, një ekip mjekësor i EULEX-it dje në mbrëmje ekzaminoi z. D.P, i cili është ndaluar nga Policia e Kosovës”, deklaroi shefi i EULEX-it.
“Ky është ekzaminimi i dytë mjekësor i D.P., kryer nga një ekip mjekësor i EULEX-it”, shkroi ai.
“E para u zhvillua një javë më parë”, deklaroi Wigemark në Twitter.
Ish pjesëtari i Policisë së Kosovës, Dejan Pantiq, ndodhet në paraburgim në afat prej 30 ditësh, nën akuzat për përfshirje në demolimin dhe hedhjen e shok-bombave në zyrat e Komsionit Komunal Zgjedhor në Mitrovicën e Veriut.
RTKlive
