Shtëpia e Bardhë konfirmon negociatat e drejtpërdrejta të administratës Trump me Hamasin
Zëdhënësja e Shtëpisë së Bardhë konfirmoi negociatat e drejtpërdrejta mes administratës Trump dhe Hamasit dhe tha se përfaqësuesi i posaçëm i presidentit amerikan Donald Trump për çështjet e pengjeve ka leje për të negociuar me Hamasin.
Sipas agjencisë iraniane të lajmeve IRNA, Karoline Leavitt, në një konferencë shtypi me gazetarët të mërkurën, në përgjigje të një pyetjeje në lidhje me negociatat e Amerikës me Hamasin dhe kundërshtinë e kësaj me politikën e kahershme të Uashingtonit, tha: “Adam Boehler, përfaqësuesi special i Amerikës për çështjet e pengjeve, lejohet të flasë me këdo, edhe pse Amerika zakonisht e ndalon ndërveprimin me grupet terroriste”.
Zëdhënësja e Shtëpisë së Bardhë pohoi se jetët e amerikanëve të kapur në Gaza ishin në rrezik dhe për këtë arsye u mor ky vendim.
'Axios' dhe 'New York Times' raportuan të mërkurën se Shtetet e Bashkuara të Amerikës kanë zhvilluar bisedime të drejtpërdrejta me Hamasin në Katar për të siguruar lirimin e pengjeve që ende mbahen në Gaza, me Boehler që drejton bisedimet në emër të administratës Trump.
Axios gjithashtu, duke cituar një burim, raportoi se presidenti amerikan, Donald Trump, u takua sot në Shtëpinë e Bardhë me një grup “pengjesh” të cilët së fundmi u liruan në kuadër të marrëveshjes së armëpushimit të Gazës.
Negocimi i drejtpërdrejtë i administratës Trump me Hamasin konsiderohet një ndryshim në politikën e Uashingtonit, sepse Shtetet e Bashkuara të Amerikës e konsiderojnë Hamasin një organizatë terroriste. Sipas portalit Axios, Boehler dhe zyrtarët e Hamasit u takuan në Doha javët e fundit.
