OKB: Familje të tëra janë vrarë në Siri

Zyra e OKB-së për të drejtat e njeriut tha të martën se familje të tëra, duke përfshirë gra dhe fëmijë, janë vrarë në rajonin bregdetar të Sirisë.

"Në një numër rastesh jashtëzakonisht shqetësuese, familje të tëra - duke përfshirë gra, fëmijë dhe të moshuar- u vranë, në veçanti në qytete dhe fshatra kryesisht alavite," tha zëdhënësi i zyrës së OKB-së për të drejtat e njeriut Thameen Al-Kheetan.

"Shumë nga rastet e dokumentuara ishin ato të ekzekutimeve masive. Ato duket se janë kryer mbi baza sektare...," u tha Al-Kheetan gazetarëve.

Në disa raste, burrat u qëlluan për vdekje para familjeve të tyre, tha ai, duke përmendur dëshmitë e të mbijetuarve.

Shefi i të drejtave të njeriut të OKB-së Volker Turk përshëndeti një njoftim nga administrata e HTS për të krijuar një komitet llogaridhënieje dhe bëri thirrje që ato hetime të jenë të shpejta, të plota, të pavarura dhe të paanshme, shtoi zëdhënësi i zyrës së OKB-së për të drejtat e njeriut.

Ndërkohë, ushtria izraelite tha të martën se avionët e saj luftarakë kishin goditur gjatë natës Sirinë jugore, duke synuar sistemet e mbrojtjes ajrore dhe objekte të tjera ushtarake në sulmin e fundit në vendin fqinj.

Mediat siriane kishin thënë se Izraeli goditi provincën jugore të Daraa-s, me observatorin që raportoi të paktën 17 sulme në pozicionet e ish-ushtrisë siriane, duke përfshirë një platformë vëzhgimi dhe tanke.

Një deklaratë nga ushtria izraelite tha se "avionët e saj luftarakë goditën radarët dhe mjetet e zbulimit të përdorura për ndërtimin e vlerësimeve të inteligjencës ajrore", si dhe "pozicionet komanduese dhe vendet ushtarake që përmbajnë armë dhe pajisje ushtarake që i përkasin regjimit sirian".

Deklarata ushtarake izraelite tha se objektivat e goditura gjatë natës "u goditën për të eliminuar kërcënimet e ardhshme".