Anija më e madhe ushtarake e Iranit i bashkohet Forcës Detare

Marina Detare iraniane do të marrë në dorëzim anijen më të madhe ushtarake të vendit, një transportues helikopterësh të prodhuar në mënyrë autoktone i pajisur për të realizuar detyra të rëndësishme logjistike në mbështetje të misioneve të forcës detare të Iranit.

Luftanija Makran do të bashkohet me flotën jugore të Marinës së Iranit, të Mërkurën në prani të Shefit të Shtabit të Forcave të Armatosura iraniane Gjeneral Major Muhamed Bakeri dhe Kryekomandantit të Ushtrisë Gjeneral Major Abdolrahim Musavi. Anija do të mbështesë misionet e Marinës në ujërat e largëta, të tilla si pjesa veriore e Oqeanit Indian, ngushtica Bab al-Mandab dhe Deti i Kuq. Anije të tilla janë projektuar të shërbejnë si një "port detar i lëvizshëm" dhe, për këtë arsye, konsiderohen elementë kryesorë të infrastrukturës së çdo force detare. E mërkura do të shënojë gjithashtu fillimin e stërvitjeve detare të Marinës Detare të Iranit, të koduara me emrin Forca Detare. Stërvitjet do të zhvillohen në Detin e Omanit dhe në Oqeanin Indian për të provuar aftësinë operative të forcës detare në ujërat jashtë shtetit. Disa njësi detare tashmë janë dislokuar në të gjithë zonën detare në përgatitje të manovrës.