Raisi parashtron planet ndërsa Parlamenti debaton mbi ministrat e kabinetit

Presidenti i Republikës Islamike të Iranit Ebrahim Raisi deklaroi se ai ka zgjedhur një kabinet për të përmirësuar ekonominë e Iranit dhe për të luftuar korrupsionin ndërsa Parlamenti filloi debatin mbi ministrat e propozuar nga Presidenti.

Presidenti Raisi mori pjesë në një seancë të hapur të Parlamentit të Shtunën në mëngjes së bashku me zëvendësin e tij Muhamed Mokhber dhe shefin e tij të stafit Gholam Husein Esmaili. Presidenti filloi me një përshkrim të planeve të tij për kabinetin e ardhshëm, duke thënë se ato janë hartuar për të siguruar drejtësinë dhe përparimin në Iran. "Ne e dimë që koha për shërbimin është e shkurtër dhe dhimbjet dhe problemet e njerëzve janë të shumta," tha Raisi. Ai vuri në dukje përpjekjet që synojnë frenimin e pandemisë së koronavirusit si një përparësi kryesore, duke thënë se rritja e ekonomisë së vendit dhe përmirësimi i jetesës së njerëzve janë gjithashtu prioritete në axhendën e tij. Presidenti Raisi tha se lista e propozuar e ministrave të tij përbëhet nga figura të reja dhe me përvojë, karakteristika kryesore e të cilëve është angazhimi për të punuar me zell dhe për të luftuar korrupsionin. Presidenti mbrojti përbërjen e kabinetit, duke thënë se ai ishte përpjekur të zgjidhte më të kualifikuarit në fusha të ndryshme. Më 13 gusht, Raisi dorëzoi listën e ministrave të tij për të marrë votëbesimin në Parlament. Presidenti do të ketë deri në tre muaj kohë për të emëruar një zëvendësues në rast se ndonjë nga ministrat e propozuar nuk arrin të fitojë votëbesimin e deputetëve.