Gjeneral Bagheri: Irani do të rrisë bashkëpunimin ushtarak me Rusinë

Komandanti i lartë ushtarak i Iranit theksoi se Republika Islamike është e vendosur për zgjerimin e bashkëpunimit ushtarak me Rusinë në përputhje me politikën e administratës së Presidentit Ebrahim Raisi, "Vështrim drejt Lindjes".

Duke folur të Dielën për agjencinë IRNA pas mbërritjes së tij në Moskë, Shefi i Shtabit të Përgjithshëm të Forcave të Armatosura të Iranit, Gjeneral Major Mohammad Bagheri, tha se administrata e re e Iranit i kushton rëndësi të veçantë Lindjes dhe vendeve Lindore. Ai theksoi vendimin e Organizatës së Bashkëpunimit të Shangait (SCO) për të pranuar anëtarësimin e plotë të Iranit në aleancën politike, ekonomike dhe të sigurisë së Euroazisë pas inaugurimit të administratës së re iraniane. Komandanti i lartë iranian theksoi gjithashtu se Forcat e Armatosura të Iranit dhe Rusisë do të forcojnë bashkëpunimin ushtarak. Bagheri tha se Irani ka nënshkruar marrëveshje me Rusinë për blerjen e armëve pas përfundimit të një embargoje të OKB-së ndaj Teheranit, çka do të diskutohet gjatë vizitës aktuale. "Ne kemi bashkëpunim me Forcat e Armatosura të Rusisë dhe bashkëpunimi dypalësh është përmirësuar vitet e fundit", shtoi ai. Në krye të një delegacioni ushtarak të rangut të lartë, Gjeneral Major Mohammad Bagheri udhëtoi për në Moskë me ftesë zyrtare të Ministrit të Mbrojtjes të Federatës Ruse dhe Gjeneralit të Ushtrisë Sergei Shoigu. Zgjerimi i bashkëpunimit ushtarak dhe mbrojtës, lufta kundër terrorizmit dhe zhvillimet kryesore rajonale dhe ndërkombëtare janë ndër çështjet në axhendën e bisedimeve midis zyrtarëve iranianë dhe rusë.