Irani u kërkon Azerbajxhanit dhe Armenisë të ushtrojnë përmbajtje

Irani ka shprehur shqetësim për përplasjet e fundit kufitare midis Azerbajxhanit dhe Armenisë, duke u kërkuar dy fqinjëve të ushtrojnë përmbajtje dhe të përdorin dialogun për të zgjidhur mosmarrëveshjet.

“Ashtu si në të kaluarën, Republika Islamike e Iranit është e gatshme të ndihmojë të dyja palët të zgjidhin mosmarrëveshjet dhe të vendosin stabilitet dhe paqe në rajon”, tha të martën zëdhënësi i Ministrisë së Jashtme iraniane, Said Khatibzadeh. Ai shtoi se të gjitha vendet duhet të respektojnë kufijtë e njohur ndërkombëtarisht dhe i bëri thirrje Bakut dhe Jerevanit që të rregullojnë mosmarrëveshjet përmes dialogut dhe kanaleve paqësore. Zëdhënësi iranian paralajmëroi se sfidat e vazhdueshme do të përbënin rrezik për procesin gradual për promovimin e paqes dhe përparimit rajonal. Armenia dhe Azerbajxhani të martën akuzuan njëri-tjetrin për fillimin e luftimeve përgjatë kufirit të tyre të përbashkët, një vit pas luftës së tyre mbi territorin e kontestuar të Nagorni-Karabakh.