Takim i ministrave të Jashtëm të Iranit dhe Spanjës

Ministri i Jashtëm iranian Hossein Amir-Abdollahian të dielën iu referua bisedimeve në vazhdim midis Iranit dhe pesë fuqive botërore në Vjenë, duke nënvizuar nevojën që Franca, Britania dhe Gjermania të përmbushin rolin e tyre dhe të bëjnë përpjekje për të siguruar të drejtat legjitime të Iranit.

Amir-Abdollahian i bëri komentet në një takim me homologun e tij spanjoll José Manuel Albares në margjinat e edicionit të 58-të të Konferencës së Sigurisë në Mynih. Ai tha se bisedimet në Vjenë kanë arritur në një pikë që kërkon vendime politike nga pala perëndimore për të arritur një marrëveshje. Ministri i Jashtëm iranian theksoi gjithashtu se Teherani dhe Madridi duhet të përshpejtojnë bashkëpunimin dypalësh, në farmaceutikë, burimet ujore, energjitë e rinovueshme dhe në veçanti në sektorin e transportit. Amir-Abdollahian e ftoi ministrin e Jashtëm spanjoll të vizitojë Iranin. Ministri i Jashtëm spanjoll, nga ana e tij, tha se vendi i tij i kushton rëndësi të veçantë marrëdhënieve me Iranin, duke theksuar se ruajtja e marrëdhënieve ekonomike me Teheranin gjatë kohës së sanksioneve ishte një vendim i vështirë i marrë nga Madridi. Duke iu referuar kryesimit të radhës të Bashkimit Evropian nga Spanja, ai tha se Madridi është i gatshëm të rrisë bashkëpunimin me Teheranin.