Irani dënon ndërhyrjen e SHBA-së në punët e brendshme të Kinës

Irani dënoi ndërhyrjen e Uashingtonit në punët e brendshme të Kinës dhe shkeljen e integritetit territorial të Kinës, pasi kryetarja e Dhomës së Përfaqësuesve të SHBA po bën një vizitë provokuese në Tajvan, duke rritur ashpër tensionet me Pekinin.

Zëdhënësi i Ministrisë së Jashtme iraniane Naser Kanani tha të martën se "sjellja e fundit tensionuese" e zyrtarëve amerikanë në ndërhyrjen në punët e brendshme të Kinës dhe shkeljen e integritetit të saj territorial ishte një shembull i politikave ndërhyrëse të Uashingtonit në pjesë të ndryshme të botës. Kjo sjellje, shtoi ai, “nuk do të ketë asnjë rezultat përveç rritjes së paqëndrueshmërisë dhe nxitjes së armiqësive, prandaj duhet të dënohet”. “Respekti për sovranitetin kombëtar të vendeve është një nga parimet themelore të Kartës së Kombeve të Bashkuara”, tha zëdhënësi i Ministrisë së Jashtme të Iranit. “Neni 2 i Kartës së OKB parandalon anëtarët nga çdo sjellje që dëmton integritetin territorial dhe pavarësinë politike të shteteve të tjera”. Ai shtoi se “Republika Islamike e Iranit e konsideron respektimin e integritetit territorial të vendeve si ndër parimet e politikës së saj të jashtme dhe mbështetja për politikën e një Kine të Vetme është e padiskutueshme në përputhje me këtë parim”. Kanani tha se unilateralizmi dhe shkeljet e rregulloreve dhe angazhimeve ndërkombëtare janë bërë pjesë integrale e politikës së jashtme të SHBA-së.