Irani kritikon vendet evropiane për pretendimet për të drejtat e njeriut

Zëdhënësi i Ministrisë së Jashtme të Iranit, Naser Kanani, denoncoi të hënën Britaninë e Madhe dhe disa vende evropiane për reagimin e tyre ndaj ekzekutimit nga Irani të shtetasit të tij Alireza Akbari, i cili ishte dënuar me vdekje për spiunim në favor të Britanisë.

"Lëvizja e Britanisë së Madhe kundër sigurisë kombëtare të Iranit mori përgjigjen e fortë të inteligjencës dhe gjyqësorit të Iranit," shkroi Kanani në faqen e tij në Twitter, duke shtuar se zhurma e Mbretërisë së Bashkuar dhe mbështetja për qeverinë e Londrës nga disa vende evropiane, të cilat pretendojnë se mbrojnë të drejtat e njeriut, tregojnë se ato po i largohen drejtësisë dhe po shkelin ligjin. “Regjimi britanik, anëtari i familjes mbretërore të të cilit pa u turpëruar ka pranuar se ka vrarë 25 njerëz të pafajshëm dhe i ka parë ata si gurë shahu që ai po i hiqte nga fusha e lojës, si dhe ata që kanë mbyllur sytë ndaj këtij krimi lufte nuk janë të aftë tu japin leksione të tjerëve për të drejtat e njeriut”, shkroi zëdhënësi i Ministrisë së Jashtme të Iranit në një postim në Twitter. Ai i referohej Princit Harry, i cili ka thënë në një kujtim se ai vrau 25 njerëz ndërsa ishte duke shërbyer në Afganistan me ushtrinë britanike. Të shtunën, më 14 janar, Irani ekzekutoi Alireza Akbari, i cili kishte një pasaportë britanike, për bashkëpunim me shërbimin sekret britanik të spiunazhit MI6 kundër sigurisë kombëtare të Iranit. Mbretëria e Bashkuar si përgjigje sanksionoi prokurorin e përgjithshëm të Iranit.