Irani kërkon përmbajtje, dialog dhe dhënien fund të luftimeve në Sudan

Irani ka shprehur shqetësimin e tij për dhunën e vazhdueshme në Sudan, duke u kërkuar palëve kundërshtare të tregojnë përmbajtje dhe të angazhohen në dialog për t'i dhënë fund trazirave në vend.

"Republika Islamike e Iranit shpreh shqetësimin e saj për atë që po ndodh në vendin musliman dhe vëllazëror të Sudanit," tha të shtunën zëdhënësi i Ministrisë së Jashtme iraniane Naser Kanani. Ai i kërkoi Sudanit të kapërcejë situatën aktuale shqetësuese përmes dialogut. Zëdhënësi iranian shprehu besimin se dialogu sudanez-sudanez dhe konsensusi i brendshëm për një iniciativë kombëtare janë zgjidhja e vetme për krizën aktuale. Edhe Shefi i politikës së jashtme të Bashkimit Evropian, Josep Borrell, tha se ai po ndiqte me shqetësim ngjarjet në Sudan. "Duke ndjekur me shqetësimin më të madh ngjarjet e vazhdueshme në Sudan, BE u bën thirrje të gjitha palëve të interesuara dhe partnerëve rajonalë që të rikthejnë në rrugën e duhur procesin e tranzicionit," shkroi Borrell në llogarinë e tij në Twitter. Sekretari i Përgjithshëm i Lidhjes Arabe Ahmed Aboul Gheit shprehu gjithashtu shqetësim në lidhje me zhvillimet aktuale në Sudan. Ai gjithashtu u bëri thirrje të dyja palëve që të kthehen në negociata për të zgjidhur mosmarrëveshjen e tyre.