Ministri i Jashtëm iranian: Izraeli është përgjegjës për krizën humanitare të Gazës

Ministri i Jashtëm iranian Hossein Amir-Abdollahian e konsideron Izraelin përgjegjës për krizën humanitare që po ndodh në Rripin e rrethuar të Gazës, pasi banorët e Gazës janë privuar nga ushqimi, uji dhe energjia elektrike, duke shprehur gatishmërinë e Iranit për të dërguar ndihma humanitare në rajon.

Gjatë një bisede telefonike me Sekretarin e Përgjithshëm të Kombeve të Bashkuara Antonio Guterres të mërkurën, Amir-Abdollahian e përshkroi Operacionin Stuhia Al-Aksa  si një nismë palestineze dhe një përgjigje të drejtpërdrejtë ndaj krimeve të luftës dhe masave radikale të kryeministrit izraelit Benjamin Netanyahu dhe të administratës së  tij ekstremiste gjatë muajve të fundit.

"Gaza aktualisht është nën një rrethim të plotë. Uji dhe energjia elektrike janë ndërprerë dhe ilaçet dhe ushqimet nuk lejohen të arrijnë tek fëmijët, gratë dhe civilët e tjerë. E gjithë kjo po ndodh në mes të sulmeve dhe krimeve të luftës të regjimit sionist”, tha kryediplomati iranian.

Ai vuri në dukje numrin e lartë të grave dhe fëmijëve në mesin e viktimave palestineze në Rripin e Gazës, duke deklaruar se Izraeli mbahet përgjegjës për pasojat negative dhe përkeqësimin e kushteve në territorin e Rripit të Gazës. Amir-Abdollahian shprehu gjithashtu gatishmërinë e Iranit për të dërguar ndihma humanitare në Gaza, duke thënë se OKB-ja pritet të ndërmarrë veprime urgjente për të dërguar ujë, ushqim dhe furnizime humanitare për palestinezët në territorin e varfër.

Nga ana e tij, Guterres tha se qindra anëtarë të stafit të OKB-së në Gaza po përballen me kushte të rënda dhe disa prej tyre madje janë vrarë në sulmet izraelite. “Ne gjithmonë kemi kundërshtuar politikat ekstremiste të zyrtarëve izraelitë. Ne besojmë se problemet mund të zgjidhen përmes njohjes së të drejtës së palestinezëve për të vendosur fatin e tyre dhe për të formuar një shtet të pavarur sovran palestinez”, tha Guterres.

Sekretari i përgjithshëm i OKB-së vuri në dukje se organizmi botëror po konsultohet gjerësisht me palë të ndryshme për të parandaluar përhapjen e konfliktit në rajone të tjera. Ndërsa vlerësoi gatishmërinë e Iranit për të dërguar ujë, ushqime dhe ilaçe në Gaza në koordinim me Komitetin Ndërkombëtar të Kryqit të Kuq dhe Kombet e Bashkuara, Guterres shprehu shqetësimin se një katastrofë në Gaza ka shumë të ngjarë pasi karburanti për termocentralet po mbaron.