Iran: Situata rajonale i ngjan “fuçisë së barutit” gati për të shpërthyer

Ministri i Jashtëm i Iranit e ka krahasuar situatën aktuale në Azinë Perëndimore me një "fuçi baruti" gati për të shpërthyer, duke shprehur shpresën për dhënien fund të krimeve të luftës të Izraelit kundër palestinezëve në Rripin e Gazës.

Hossein Amir-Abdollahian i bëri këto komente të enjten përpara se të largohej nga qyteti saudit Xheddah, ku mori pjesë në një takim urgjent të Komitetit Ekzekutiv të Organizatës së Bashkëpunimit Islamik (OIC) mbi bombardimet e përgjakshme izraelite kundër Gazës.

Ai tha se të gjithë ministrat e jashtëm që morën pjesë në seancë ranë dakord për ndërprerjen e menjëhershme të krimeve të luftës të regjimit sionist.

Kryediplomatët, tha ai, ishin gjithashtu të shqetësuar seriozisht për përhapjen e luftës, diçka që duket e pashmangshme dhe mund të ndodhë në çdo orë.

“Rrethanat në rajon i ngjajnë një fuçie baruti gati për të shpërthyer, situata mund të dalë jashtë kontrollit. Shpresojmë të shohim fundin e krimeve të luftës kundër popullit të Gazës sa më shpejt të jetë e mundur”, tha Amir-Abdollahian.

Ministri i Jashtëm iranian vuri në dukje gjithashtu se në bisedimet me homologët e tij ai kishte dënuar presidentin amerikan Joe Biden për vizitën e tij në rajon në mbështetje të palës kriminale dhe luftënxitëse.

“Në takimet dypalëshe ka pasur kritika serioze ndaj presidentit amerikan Biden; para së gjithash, sepse një spital në Gaza është vënë në shënjestër të bombave sioniste dhe më shumë se një mijë civilë, pacientë dhe personel mjekësor janë martirizuar, por Biden viziton rajonin në mbështetje të luftënxitësit" tha ai.