Sulm raketor i Pakistanit në një fshat kufitar në Iran
Shefi i sigurisë i provincës së Sistanit dhe Baluçistanit të Iranit njoftoi vdekjen e "tre grave dhe katër fëmijëve të shtetasve jo iranianë" si rezultat i sulmit raketor të Pakistanit në një fshat kufitar.
Sipas Agjencisë së Lajmeve Mehr, Alireza Marhamati shtoi: Në orën 04:50 të mëngjesit të së enjtes u dëgjua zhurma e disa shpërthimeve në zonën Shamsar të qytetit Saravan dhe në këtë ngjarje u vranë tre gra dhe katër fëmijë jo iranianë.
Në të njëjtën kohë, kanali i lajmeve CNN, duke cituar zyrtarë të sigurisë në Pakistan, shkruan se ky shtet ka shënjestruar shtatë pika në Iran.
Ky sulm erdhi një ditë pasi Irani tha se sulmoi selinë e grupit terrorist Jaish al-Adl në Pakistan, i cili u prit me një reagim të fortë nga Islamabadi.
Grupi Jaish al-Adl, i cili është në listën e zezë të Iranit si një grup terrorist, u formua në vitin 2012 dhe ka kryer disa sulme në tokën iraniane në vitet e fundit. Ministria e Jashtme e Pakistanit deklaroi se ambasadori iranian nuk do të lejohet të kthehet në Islamabad për momentin.
Pakistani gjithashtu ka pezulluar të gjitha "takimet e nivelit të lartë" me Iranin. Sipas Reuters, ministria e mbrojtjes e Pakistanit njoftoi në një deklaratë se ka shënjestruar vendstrehimet e terroristëve me origjinë pakistaneze brenda Iranit.
Në këtë deklaratë thuhet: Pakistani respekton plotësisht sovranitetin dhe integritetin territorial të Republikës Islamike të Iranit. Qëllimi i vetëm i aksionit të sotëm ishte mbrojtja e sigurisë dhe interesave kombëtare të Pakistanit, gjë që është e rëndësishme dhe nuk mund të cenohet.