Irani mohon t'i ketë ofruar Rusisë raketa balistike
Misioni i Përhershëm i Iranit në Kombet e Bashkuara në Nju Jork ka hedhur poshtë raportet e mediave perëndimore që pretendonin se Republika Islamike e Iranit i kishte ofruar Rusisë raketa balistike për t'i përdorur në luftën e saj me Ukrainën.
“Pavarësisht asnjë kufizimi ligjor për shitjen e raketave balistike, Irani është moralisht i detyruar të përmbahet nga transaksionet e armëve gjatë konfliktit Rusi-Ukrainë për të parandaluar nxitjen e luftës – dhe kjo është e rrënjosur në respektimin e Iranit ndaj ligjit ndërkombëtar dhe Kartës së OKB-së”, tha të premten misioni i Përhershëm i Iranit në Kombet e Bashkuara në faqen e tij zyrtare në rrjetin X.
Të mërkurën, agjencia e lajmeve Reuters, duke cituar "gjashtë burime", tha se Irani i kishte dhënë Rusisë rreth 400 raketa të fuqishme balistike tokë-tokë.
Agjencia e lajmeve Reuters pohoi se "dërgesat filluan në fillim të janarit pasi një marrëveshje u finalizua në takimet në fund të vitit të kaluar midis zyrtarëve ushtarakë dhe të sigurisë iraniane dhe ruse që u zhvilluan në Teheran dhe Moskë".
Pas raportit, administrata amerikane paralajmëroi për një përgjigje "të shpejtë dhe të ashpër" nga komuniteti ndërkombëtar nëse Irani do t'i kishte ofruar raketa balistike Rusisë.
Teherani dhe Moska kanë thënë në raste të ndryshme se dhënia e armëve të prodhuara nga Irani për Rusinë është pjesë e bashkëpunimit ushtarak midis dy vendeve dhe kanë mohuar pretendimet e zyrtarëve perëndimorë dhe mediave se armët janë përdorur në luftën në Ukrainë.
