Raisi: Rajoni të përfitojë nga bashkëpunimi Iran-Sri Lanka
Presidenti iranian Ebrahim Raisi tha se nga përmirësimi i marrëdhënieve ekonomike dhe politike midis Iranit dhe Sri Lankës do të përfitonin të dy vendet dhe rajoni i Oqeanit Indian.
Raisi i bëri komentet të mërkurën në një konferencë të përbashkët shtypi me presidentin e Sri Lankës Ranil Wickremesinghe në kryeqytetin e Sri Lankës Colombo.
Ai tha se Irani është i gatshëm të ofrojë shërbime teknike dhe inxhinierike në Sri Lanka për të ndihmuar vendin të rrisë infrastrukturën e tij ekonomike dhe industriale.
Presidenti iranian i bëri komentet disa orë pasi inauguroi një projekt të madh hidroelektrik në rajonin Badulla, që ndodhet rreth 230 kilometra në lindje të Colombos. Projekti i cili vlen mbi 500 milionë dollarë, është projektuar dhe ndërtuar kryesisht nga kompani iraniane për të ndihmuar Sri Lankën të kapërcejë problemet e saj me energjinë elektrike dhe rezervimin e ujit.
Raisi tha se Irani kishte përparuar në fusha të ndryshme të teknologjisë gjatë viteve të fundit, pavarësisht se ishte subjekt i një regjimi të ashpër të sanksioneve të huaja.
Ai tha se Irani dhe Sri Lanka së shpejti do të formojnë një komitet ndërqeveritar për të rritur ndjeshëm lidhjet e tyre tregtare dhe ekonomike.
Presidenti i Sri Lankës, nga ana e tij, në konferencën e përbashkët për shtyp tha se vendi i tij është mbështetur në ndihmën e Iranit për të përballuar një krizë të madhe ekonomike në vitet e fundit.
Wickremesinghe tha se gjatë vizitës së Presidentit Raisi, Sri Lanka dhe Irani kishin rënë dakord për të bashkëpunuar më shumë për çështjet që lidhen me Oqeanin Indian dhe për iniciativat e përbashkëta në Kombet e Bashkuara.
Ai tha se pesë memorandume mirëkuptimi të nënshkruara më herët gjatë ditës midis ministrave të qeverisë së Sri Lankës dhe Iranit do të çonin në një zgjerim të mëtejshëm të marrëdhënieve midis dy vendeve.
