Garantuesit e bisedimeve të paqes në Siri do të takohen në Katar

Ministri i Jashtëm i Iranit, Abbas Araghchi, ka njoftuar se diplomatët më të lartë të tre shteteve garantuese të procesit të paqes në Astana do të takohen në Katar për të diskutuar mbi ringjalljen e terrorizmit në Siri.

Araghchi tha të mërkurën se do të shkojë në Katar në fillim të javës së ardhshme për të marrë pjesë në Forumin e Dohas.

Duke vënë në dukje se në Doha do të jenë të pranishëm edhe kryediplomatët e Rusisë dhe Turqisë për të marrë pjesë në takim, Araghchi bëri të ditur se takimi i radhës i procesit të Astanasë në nivel të ministrave të jashtëm do të mbahet në kryeqytetin e Katarit.

“Sigurisht, Katari nuk do të marrë pjesë në këtë takim dhe meqë këta ministra janë në Doha, ne do ta mbajmë takimin atje”.

Irani dhe Rusia, si aleatë të qeverisë siriane, si dhe Turqia, e cila është në anën e opozitës, ngritën procesin e paqes në Astana në janar 2017, duke synuar t'i japin fund konfliktit sirian, i cili shpërtheu në vitin 2011, përmes ndërmjetësimit mes qeverisë së Damaskut dhe opozitës.

Gjithashtu të mërkurën, Moska tha se tre shtetet garantuese janë në kontakt të ngushtë për konfliktin në Siri.

"Ministrat e jashtëm të tre vendeve garantuese, Rusia, Irani dhe Turqia, janë në kontakt të ngushtë me njëri-tjetrin," u tha gazetarëve zëdhënësja e ministrisë së jashtme ruse Maria Zakharova.

Ajo shtoi se Moska "po punonte në mënyrë aktive me partnerët ndërkombëtarë për të siguruar stabilizimin e shpejtë të situatës në Siri".